رباعيات علاء الدين سعيد .. الزجلية

الزمن
===

ياللى قلبك شمعه بيضه منوره

شفتها وىَّ المحبه منوره

أوعى تزعل يوم يا صاحبى م الزمن

الزمن عمره ما رَجَّعنا لْوَرَه

غرايب
===

مش غريب تلقى لسان يطوَل عليك

مش غريب إنك ف يوم تبكى عِنيك

ف الزمن ده إيه ح تلقاه شىء غريب

غير وفا و إخلاص و حدّ يكون شاريك

خفة دمك
===

خفة الدم اللى فيك دوبتها

بين حروف تحلو بيك لو قلتها

و العسل جواك باخاف لاتمرره

بالزعل مره ف دنيا فهمتها

حياة
===

الحياه جواك رساله و اعتبار

و الكفاح فيها أمانه و اختبار

حتى لو خانك نصيبك يا أصيل

بالقى كتفك شال حمول الإصطبار

إفرح
===

لو حمولك فوق كتافك كوم تقيل

و الهموم جواك بشيلها راح تميل

دوب الأحزان ف أفراح البشر

كله يفرح .. و الهموم عنك نشيل

مصالح
=====

صاحبك يشيلك ف عينه لو ف مصلحته

و ان يوم ف غلطه تدينه تبقى قبحته

وف ثانيه تصبح عدوه و انت له صافى

و يهون عَلِيه يتعبك و انت اللى ريحته

حاسب
====

لو جار زمانك عليك و عرفت فيه واطى

حاسب لايوم يحكمك بجميله و تطاطى

أصل الأصيل يخدمك بعنيه ولا يعايرك

أما الخسيس يفضحك ، أصل الخسيس واطى

عذاب
====

يا حلو ياللى العذاب دقدق على بابك

إيه اللى ناب الغرام منك و إيه نابك

غير السهر و الدموع و الحيره و الحرمان

لو يوم ح ترضى العذاب ، دايمًا ح يرضابك

أسعار
=====
و الله يا وزارة التموين لأفديكى

و تعيشى و نموت بأسعارك و نرضيكى

لو ترفعى السعر إيه يعنى؟ بلاش ناكل

بس الوصيه الكفن .. يرخص على أديكى

طابور
====

لمَّا الأوان آن قالولى : راح تخش الجيش

قدمت أوراقى قالوا : م الطابور ماتجيش

و فضلت واقف سنه و اتنين و جيت طالع

بصيت أتارى اللى واقف فيه " طابور العيش "

أيادى
===

فيه أدين تتمد لاجل تكون حنان

فيه أدين مخلوقه للقسوه كمان

فيه أدين خاينه ماتعرف أصلها

مش بيتمر فيها خيرك مهما كان

غربه
===

من بعد طول السفر و الشوق لخلانى

و الحيره وىَّ السهر ، حنيت لأوطانى

شديت رحال القمر فوق سكة الموال

ف الغربه لولا القدر لم حد خلانى

عوده
====

و رجعتلك يا وطن وف قلبى كام موال

و حكايه عن غربتى ف الصبر راح تنقال

ماسك ف إيدى قلم حن لألم قلبى

حالف لايوصف لكم ايه كانت الأحوال

ناس
===

و رجعتلك يا وطن و البعد عنك مُر

قابلت فيك يا وطن صنف الذليل و الحُر

و عرفت ناس من سيرتها تجيلك الخيرات

و عرفت ناس إسمها بيجيب لوحده الفقر

رعب
===

ماتبصليش و النبى لحسن بخاف منك

و البنطلون اللى حيلتى اتبلّ إكمنك

قاعد و بتبصلى معرفش عايز إيه

يكفينا شرك و يبعد شرنا عنك

نصيحه
====

أسوب جنابك على غيرى يجوز يمشى

تشخط تزعق تهلل أو ماتفهمشى

بس اللى عايزك تكون فاهمه لمصلحتك

إلا أنا و النبى .. لحسن ماتسلمشى

بالعافيه
====

عمرى ما شفت الشرف يبقى بزعيق و صداع

و ازاى يكونلى الشرف بيك و انت صوت جعجاع؟

إن كت قيمه فأعمالك تبيّنها

و الرأى يبقى لنا ، مش ليك بلوى دراع

..... أدب
=========
إن كان لسان الأدب ح يبوظه لسانك

ح العن سنين الأدب و تغور على شانك

دانت البعيد قصتك دايه ماتكتبهاش

لو يوم تصون الأدب ، تلقى الأدب صانك

قميص
===

إن عزت تبقى أديب ، الأول اتأدب

و اخلع قميص الغرور.. للناس ح تتقرب

أصل القميص ده يدارى جتة الجربان

يعنى قميص الغرور مايدارى غير لاجرب

مناظره
===

لو كنت فارس صحيح، م تياللا نتبارز

طلع سلاحك قوام ، وان كنت مش عايز

تبقى انت هجاص و بطل تقلق اسيادك

اللى الجنين عندهم يطلع عليك فايز

أعمار
===

سنك و سن القلم عندى مابينهم تار

سنك سبقنا صحيح ، دا ف دفتر الأعمار

لكن دا عمر القلم عندى ف أمجاده

سابقك سنين ف الزجل و كتابة الأشعار

أفكار
===

عاقر دماغك و راح تحبل على إيدى

و تجيب لنا كام قصيده و يبقى يوم عيدى

و احلف لافرق عليك يوم السبوع أشعار

ما عرفت يوم زيها ، و تقولَّى يا سيدى

فلان الفلانى
====

حضرة فلان الفلانى .. قال عاملِّى أديب

مادام مسك لى القلم فاكر كلامه يطيب

و رغم خيبته ف بيته و البيوت أسرار

سايب مراته و جاى يعمل لنا حبيب

تسابيح
===

طار الحمام ع الشجر بيسبح الرحمن

رد النسيم ف الزهر و عبيره رد كمان

سبحانه رب الوجود كرمه مالهش حدود

سبحانه كل زمان وحده ف أى مكان

الشاب المصرى
=========

عادد خطاوى الذكريات و الغد

مادد حياته بالعرق و الكد

فارش بحبه دنيته أحلام

يمكن جدار الحزن يوم يتهد

دمنهورى
====

اللى بنى مصر كان أصله دمنهورى

علاَّالأساس و البُنا و ساب لى انا دورى

جدع و شهم و أصيل ولا ينغلب أبدًا

حريص ولا يخدعه ولا ألف واد نورى

كلمه و ندوه
======

فيه ناس بتصبر عليك و ناس بتستعجل

فيه ناس تقول باختصار و غيرها بيطوّل

و الحلو من كل ده الكلمه لو ح تفيد

ح يكون لها وزنها و نعوزها م الأول

إحساسِك
======
تحبى البحر .. تحبى البر

تحبى الخير أو حتى الشر

أعظم حب بدون إحساسِك

حرف يادوب ف حروف الجر

تلاوين
======
زىّ تمام لون صبغة شَعرِك

رحلة عمرك .. همسة شِعرك

لون كداب تحتيه مدهون

عمره فْ يوم مايْدَفـَّع مَهرك

مش كله طبعًا
============
دى مدمدمه .. دى منمنمه

دى تروللى أو متقسَمه

إختار ما شئت الإختيار

برضه النهايه الرمرمه

البقاء لله وحده
=============
حبيت كتير قبل المدام

لا الفرح زال ولا همّ دام

قابلتها اتجوزتها ...

كل اللى قبليها ما دام

مقلب
======
صاحبتنا فكرتها خلفة " بيير كاردان "

نحيفه لكن رقيقه تعدل الميلان

قلعت فريرها و فستانها و قميص النوم

لقيت ف حضنى يادوبك ..فرشه للأسنان

الأمان
======
لو يوم تأمّن خسيس على سر، يلعب بيك

يفضل يساومك عليه و يعيب و ينعاب بيك

حرّص و خليك حويط من كل صنف عويل

تدّيه أمانك و هوّه بهَمُّه بيعبّيك

محدثين
=====

المحدثين لو خدوا ، يبقوا على صنفين

فيه صنف مابينساش كان هوّه أصلاً فين

تلقاه بسيط متواضع بين جميع الناس

و صنف تانى وضيع قولولى ينصان فين

========
بقرشك يا بعجر ح تتمنظر و تتقنعر

و رجلك على التانيه راح تتحط و تفنجر

و بعد الشكاوى اللى نازله ترف من عيشتك

ح تلقى المدام و النسايب ليك عبيد و اكتر

==========
خد الأمور بالبساطه ، ح تعيش مريّح ضميرك

طبع الغرور م العباطه و النقص من طبع غيرك

إنزل ح تطلع لفوق و بذوقك تفوق الخلايق

تصبح أمير للقلاطه ولا حد يبقى أميرك

=========
مش بالرجول ع الرجول يعلا مقامك لفوق

و لا بالخروج ع الأصول بين الرجال يا ذوق

دى النفخه كدابه مليانه بفراغ و زفير

و الحق ع اللى نفخ .. لكن معانا .. فوق

======
كلّمت نفسى و انا لوحدى بصوت عالى

و صوتى كان الصراخ ، و النفس مِنعالى

قالتلى نفسى و ليه تصرخ و تتألم

دوس ع الجراح و اعتليها تشوفها من عالى

=======
كنت باكتب شِعر من رقه و حكمه

ماينافقشى أو يحابى سلطه حاكمه

شعر صادق ضاع ف دنيا العصبجيّه

سبت شعرى و رحت أتدرّب ملاكمه

==========
يا سايب الست تتنطط عليك يا عويل

و تصبّحك بهدله و تمرمطك بالليل

سوّأت سمعتنا روح اعدل قوام حالك

دى الست من غير أدب تستاهل التبديل

=========
إحتجت للأندال و نسيت كتير نصحوك

و طلبت منهم مال إتلسنوا و فضحوك

عارفين بإنك أصيل و الأصل فيهم وضيع

واخدين على التشنيع .. ليه سبتهم يجرحوك ؟!

========
السمره جمره تدفى القلب و تصونه

إسألنى عنها أقول دى الحب و شجونه

عِشرة سنين و بهواها ينحسب عمرى

دايمًا عايشها بقلبى و عقلى و جنونه

==========
نهم جشع لمام نمام تقيل الدم

مهزار هزار حَمَّار يضحك تعول الهم

غدار مفيش أسرار و ستار مالهش أمان

مانفعش فيه إصلاح ، و ازاى هّدّد يترَم ؟ّ!

========
لو كنت بين الناس ، قسم حوارك مابينهم

و اسمع كما بيسمعوك و خد من العبره عنهم

دى الدنيا دى مدرسه و العِشره أخد و عَطا

إدّى الجميع إحساس ، تستلهم الحِكمه منهم

=======
جربت كل المسالك ف البلد دى و طفت

حلفت بإنى ما سالك مهمها عشت و شفت

عجبى عليكى بلد مفروشه للأغراب

و انا فوق سبيلى الهَدَد ، فيه مهما سرت وقفت

صعايده
======
نازلين نكت ع الصعايده و همّه أجدع ناس

مدوا الحديد و الطرق و عليوا فوق بأساس

منهم زعيمنا العظيم بانى هرم أسوان

و منهم الأدبا و الفكر و الإحساس

ناصر
=====
مبروك يا بانى هرم السد فى أسوان

يا بانى مجد الوطن بالثوره ع الطغيان

مبروك عليك جنتك ف الخلد يا ناصر

و احنا ف غيابك لنا .. الصبر و السلوان

=======
حمامه جوّه القفص قالت يا سجانى

مين فينا مجنى عليه و مين عليه جانى ؟

أنا حره جوّه القفص و انت السجين جواك

خايف لا تلقى اللى فاتنى ف دنيتك جانى

=======
نسمايه رفت على الأغصان تهننها

مدت صفاها على الأطيار تحننها

صحى العبير ف الزهور يحضن قلوب هايمين

طرح الخيال الجمال ف عيون و جننها

========
مش كل لامع دهب و لا كل نادر ماس

و لا كل عز بتعب و لا كل إيد تنباس

و القيمه مش بالدهب و لا بالفلوس و الجاه

القيمه باللى انكتب جواك و بيه تنقاس

========
لملمت جرحى و كفنت الألم بالسر

و دفنته جوفى و بيّنت اللى ليكو يسر

و الله أعلم بمين عايش و مين بيموت

و انا القتيل بالعشم ف الناس .. و صبرى المر

==========
سألونى : مين العرب؟ ، قلتلهم : الشجعان

فوق السراير أسود لبُّوا ندا الأوطان

فاتحين موانع و رافعين للسما أمجاد

كاسهم دماهم و تحيا الخمره و النسوان

========
مشكلتى حب الجمال لو حتى ف الحشرات

عبرت بيه خنفسه قام حبها العشرات

ساقت دلالها و جريت للآفات و الهيم

رجعت عن حبى رامى الحسن بالجمرات

=======
أعلى جبال الصبر تحتيها انفجار

و الصمت لما يْطُول بيتولّد قرار

إياك تفكر يا خسيس صمتى هوان

أو إن صبرى ع اللى منك .. إنكسار

=========
عمر الأدب ما انحسب بالعزله أو بالصمت

و الصوم ح ينفع بإيه لو عن صلاتك صمت

دى الدنيا أخد و عطا و حوار ما بين الناس

من غير كلام هلاّس تلقى الأدب ما رمت

=========
عمرى ما ملت لسئيل ولا لعويل ولا فظ

و لا للى دمه تقيل لو حتى جابلى الحظ

دا الدين معامله و من زرع القلق يلقاه

يحرم عليه الهنا لو حتى عينه تبظ

========
الدنيا إيه غير لقا و وداع و بينهم سن

و العمر مش بالسنين لكن بما تحسن

و صاحب الفضل يفضل ع الدوام موجود

لو حتى غاب عن عيونا قلوبنا ليه ح تحن

========
ف الدنيا لازم تكرّم فوق ما تتكرّم

تعلا تزيد ف التواضع م العباد تـُكرَم

و اياك تخلى المناصب سور ما بين الناس

أو تصطنعلك شلل بتحل و تحرّم

========
طب و تجاره و آداب و حقوق و مش نافعين

و العلم راح يتنسى لو كنتوا مش ساعيين

قوم ياللا دور يا مصرى ع الكرامه و عيش

مادام نسوك الأكابر حتى فى التعيين

=======
الهم زاد حبتين و فاض بقلبى الكيل

و البخت لما يخيب تلقى الأمل بيميل

تسألنى بختى أقولك ف السباق مقدام

وقع ف ثانيه الفرس ، داست علينا الخيل

========
حظى كان ف بنيه صفره مفعصه

قلت أحسن م الهجص و البصبصه

حليوا ليها بلطجية لانفتاح ..

بعتها .. أول ما قالوا الخصخصه

========
ف زمان اللى معاه قرش يساوى القرش

ف زمان اللى بيقدر يلهف يهبش

مش طالبين غير ستر الله ..

مش طالبين حتى نحوّش

عافيه
======
قالولى ح نجوزوك .. أنا قلت مالكوش حق

سيبونى أختار بنفسى .. قالوا إخرس .. لأ

شالوا القتيل للحانوتى و هب كتب كتاب

و ف قلب حفره رمونى و ألف واحد زق

========
أنا كنت زارع دهب ، طلع الحصاد قلاليط

و عشان نصيبى الخرا ما تعدّش القراريط

أنا قلت مين يشترى بختى بلقمة عيش ؟

قالوا تغمّس بإيه بعد الخرا يا عبيط ؟!!

» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) ..الأبيات الأولى
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) الأبيات الأولى
» " عتاب " .. للشاعر / علاء الدين سعيد
» " من أنت ِ ؟! " .. قصيدة الشاعر / علاء الدين سعيد
» قصيدة "سمراء" .. للشاعر/ علاء الدين سعيد