الأعمال الغنائية للشاعر علاء الدين سعيد

الأعمال الغنائية
للشاعر
علاء الدين سعيد
***************

(1)

حيَّرتونى
********
حيرتونى يا بنات حوَّا توهتونى فأحلام حلوه
شفت السمره سحرنى سمارها شفت البيضه كوتنى بنارها
مش عارف مين فيهم أهوى
**********
شفت الليل ف عيون السمرا شفت جمال مخلوق ربانى
أما البيضه ام عيون خضره تحت جفونها حنين خلاَّنى
أفضل افكر واحتار أكتر
مش عارف مين فيهم أهوى
**********
قلت يا قلبى ح تختار مين؟ رد و قال لاتنين حلوين
وىَّ السمره تزيد دقاتى أما البيضه تزيدنى حنين
لاتنين جنبى حيروا قلبى
مش عارف مين فيهم أهوى
حيرتونى يا بنات حوَّا

===================================================================

(2)

ما أظنّّش
********
ما أظنش أبدا تنسانى ولا ترضى بهجرى وحرمانى
بقى بعد قلوبنا ما تتعاهد معقول ح تروح لحبيب تانى؟!
أبدا مش ممكن ..ما أظنش
**********
ماأظنش تتجنى عليَّه و تفوتنى وتعذب فِيَّه
عزالنا كتير يا حبيب قلبى بيقولوا كلام عنَّك لِيَّه
بيقولوا عليك حبيت غيرى ودا حيَّر قلبى و تفكيرى
بقى بعد قلوبنا ما تتعاهد معقول ح تروح لحبيب تانى؟!
أبدا مش ممكن ..ما أظنش
***********
ياما وصفوا كتير ليَّه قساوتك ولامونى كمان لمَّا قابلتك
مش قادره استحمل أسمعهم ولا قادره أفرَّط ف غلاوتك
ايه بس نايبهم م الحيره؟ أنا فاهمه كويس .. دى الغيره
بقى بعد قلوبنا ما تتعاهد معقول ح تروح لحبيب تانى؟!
أبدا مش ممكن ..ما أظنش
***********
أنا عارفه ياروحى اللى ف قلبك دقاته بتحلفلى بحُبَّك
بسمعها تدق بصوت عالى لو يوم قرَّبْت و جيت جنبك
و مادام الحب شغل بالنا مش ممكن اصدق عزالنا
بقى بعد قلوبنا ما تتعاهد معقول ح تروح لحبيب تانى؟!
أبدا مش ممكن ..ما أظنش
***********
================================================

(3)

منولوج

احترت يا ناس
***********
احترت يا ناس ف الحُب خلاص ولا عاد بيعيش ولا فيه إخلاص
إحترت يا ناس
***********
حبيت يا سلام ولا كانش كلام بيأثَّر أبدا ف غرامى
و بكلمه يا ناس عَمَلِت وسواس خلاَّ المحبوب راح ونسانى
و غلبت أسايس و أدادى واتحايل يرجع .. مش راضى
حيرنى ياناس الحب خلاص
ولا عاد بيعيش ولا فيه إخلاص
إحترت يا ناس
**********
أكتِب جوابات وابعت سلامات ولا مرَّه اتجاوب ويَّايا
والقلب احتار وانكوى بالنار و شواه الحُب ف شوَّايه
شعوطلى ياناس بهواه قلبى ونويت انساه واهجر حبى
لهلبنى يا ناس الحب خلاص
ولا عاد بيعيش ولا فيه إخلاص
إحترت يا ناس
**********
وف يوم مريت قدام البيت وندهت عليه رد عَلَيَّه
ورميت له سلام وف ثانيه قوام كان رده يا ناس جردل مَيَّه
جابلى يا جدعان انفلونزا والكحه اشتغلت لا مؤاخذه
بهدلنى يا ناس الحب خلاص
ولا عاد بيعيش ولا فيه إخلاص
إحترت يا ناس
**********
================================================
(4)
حلوين بحرى
*********
ليه بس تحير فكرى ؟ ليه ترضى عذابى وهجرى ؟
أيُّوه على قسوة قلبك هُوَّ الهجران من طبعك ؟!
والاَّ انت عشان من بحرى؟
***********
بقى يعنى اكمنى هويتك و هجرت الكل و جيتك
راح تبعد عنى وتتقل وابعتلك برضه ما تسأل
أعملَّك ايه وتريحنى
ما تقول ياغرام وتفرحنى
أيُّوه على قسوة قلبك هُوَّ الهجران من طبعك ؟!
والاَّ انت عشان من بحرى؟
***********
حلوين الدنيا بحالهم من نظره بينسوا دلالهم
أما انتو يا حلوين بحرى إحتار فِ دلالكم أمرى
أعملَّك ايه وتريحنى
ما تقول ياغرام وتفرحنى
أيُّوه على قسوة قلبك هُوَّ الهجران من طبعك ؟!
والاَّ انت عشان من بحرى؟
***********
بتحاول تنكر حبى و عنيك مش قادره تخبى
ح ينوبك يه من حيرتى غير سهدى و قلِّة حيلتى
أعملَّك ايه وتريحنى
ما تقول ياغرام وتفرحنى
أيُّوه على قسوة قلبك هُوَّ الهجران من طبعك ؟!
والاَّ انت عشان من بحرى؟
***********
============================================
(5)

***************
أنا لو ح افضل كده على طول وانسى هواك زىَ ما بتقول
يبقى ياريتنى ما كنت هويتك ولا فرَّحتِش فِيَّه عزول
**********
أنا لو احاول يوم انساك قلبى ح يفضل برضه معاك
شوف من إمتى يا روحى بحِبَّك مين وحياتك جه قسَّاك؟
دانت منايا وانت هنايا
مين بيحاول ياخدك منى؟ انا مش فاكر لِيَّه عزول
***********
كنت الأول طيف أحلامك كنت بتشكى تمللى غرامك
دغرى ح تنكر حب زمان؟ حالا تنسى يا قاسى كلامك
فين راح حُبَّك؟ مين خَد قلبك؟
ليه راح تهجر وتعذبنى؟ ليه ح تفرَّح فيَّه عزول؟
***********
أنا مش ح انسى يا روحى ليالى ماليه حياتى وشاغله خيالى
كانت حلم و مَرّ قوام مَرّ و ساب ذكراه على بالى
ياما حنان شفته زمان
قبل ما قلبك يبعد عنى قبل ما يفرح فِيَّه عزول
=======================================================
(6)
خُد يا قلبى
*********
خد يا قلبى حبى كله للحبيب ويَّاك وقولُّه
دا هدية عمر غالى صاحبه شاف ويَّاك ليالى
فيها سِحر الدنيا كله
**********
روح وقولُّه عن حياتى واحكى واوصف له أهاتى
تلقى فيها كتير قسيَّه شُفتَهَا فِ دموع عِنَيَّه
فيها شكوى فيها نجوى
فيها مُرّ الدنيا كلُّه
***********
قولُّه فين راح الحنان؟ فكَّرُه بأيَّام زمان
يمكن القى الفكر جاله والفراق حيّرله باله
والقى حُبُّه جوَّه قلبه
فاق غرام الدنيا كله
***********
أوعى تنكر عنُّه حبى أوعى تنسى الشوق يا قلبى
م انت عارف إيه بيجرى دانت قلبى وانت أدرَى
مهما ينسى مهما يقسى
هوَّ حب الدنيا كله
======================================================
(7)

نفسى أحب
**************
نفسى أحب عاوز احب
ناس قالولى الحب جنَّه نفسى اشوف الجنَّه يوم
وابقى زىِ الناس بَحِب
*************
نفسى اعيش مَرَّه الغرام نفسى أَسعِد مَرَّه قلبى
نفسى احب يا ناس حرام قلبى ليه محروم يا ربى؟
نفسى اتهنَّى فْ يوم بالحب نار أو جنَّه اهو نفسى أحب
كلهم بيقولوا جنه نفسى اشوف الجنه يوم
وابقى زى اناس بَحِب
*************
هُوَّ لمَّا القلب يفرح والتقيه بيدقّ ياما
والقى فكرى تمللى يسرح تبقى دى هِيَّه العلامه؟
يعنى ساعتها يكون بيحب؟ يعنى خلاص راح ادوق الحُب
كلهم بيقولوا جنه نفسى اشوف الجنه يوم
وابقى زى اناس بَحِب
*************
======================================================
(
رُدّ يا فل
********
رُد علَيَّه بكلمه يا فل ياللى دلالك فاق الكُل
ساكت ليه ما ترُدّ امَّال إسألأ مَرَّه علَيَّه و طُلْ
رُدّ يا فل
**********
ياللى ظالمنى وبترجَّاك تسعد قلبى بكلمه معاك
إيه ح ينوبك من هجرانى ليه تخاصمنى مادمت اهواك؟
كلمه تفرَّح قلبى يا فل
قولها وريَّح بالى يا فل
ساكت ليه ما ترُدّ امَّال إسألأ مَرَّه علَيَّه و طُلْ
رُدّ يا فل
**********
رُدّ علَيَّه كفايه خصام ليه تشغلنى يا قاسى حرام
حِنّ فْ يوم واتبَسّم حتى والاَّ ابعتلى ف مَرَّه سلام
ليه تخاصمنى؟ قوللى يا فل
يا محيرنى تمَللى يا فل
ساكت ليه ما ترُدّ امَّال إسألأ مَرَّه علَيَّه و طُلْ
رُدّ يا فل
**********
قوللى الكلمه اللى تريحنى وتهنينى وتفرحنى
ياما قالتها عنيك لعنيَّه خلى القلب كمان يصارحنى
ليه ح تخبى عليَّه يا فل
طمِّن قلبى وقولها يا فل
ساكت ليه ما ترُدّ امَّال إسألأ مَرَّه علَيَّه و طُلْ
رُدّ يا فل
**********
===================================================
(9)
أهجرنى
*********
أهجرنى ف يوم واقسى عَلَيَّه وبلاش على طول الحِنِّيَّه
دا جمال الحب ف هجرانك وف بعدك وف حيرتى عشانك
وف سهر الليل مستنيَّه
**********
لوَّعنى فْ حُبَّك و اظلمنى واتجَنَّى فْ ظُلمك و ألمنى
أوعدنى وما تروحش معادى خلينى استنَّاك إشغلنى
سيبنى اقعد افكَّر فِ غيابك واشتاق لكلامك و عتابك
و افضل على نار مستنيَّه
***********
حيَّرنى و خَبِّى اللى ف قلبك وبلاش توصفلى كتير حُبَّك
بَيِّن لى فْ مَرَّه انَّك قاسى شوقنى لعطفك ولقربك
نفسى ابعت اقولك تصافينى والقاك لا ترد ولا تجينى
و تفوتنى ف نار مستنيَّه
***********
طب قوللى انك جاىّ فْ مَرَّه وانسانى وماتجيش بالمَرَّه
شوف ايه راح يحصل مِ الغيره جربها وشوف ايه راح يجرَى
ح استنى ضرورى عشان اقابلك وساعتها عنَيَّه اللى تقولك
أنا اهُهْ على شوق مستنيَّه
***************************************
========================================================
(10)

(15)
منولوج
ليه تتضايق؟!
*********
ليه تتضايق ليه تتعكنن لما يكون صاحبك محبوب
كلمه ح اقولها : لو راح تِدَّن مش ح تغَيَّر مِ المكتوب
***********
إفرض مثلا إن انا جارك بس نصيبى كتير م الدنيا
ليه بتشعلل دايما نارك والقاك نازل قَرّ عَلَيَّه
لو ف أدَيَّه الخير طوَّالى مالَك بيَّه و بأحوالى؟
فِكرَك يعنى المولى يبارك وانت تغيَّر مِ المكتوب؟
***********
قبل ما تحسد غيرك فكَّر هوه ازاى عايش مستور
تلقاه ياما تعب واتعَكر فِ الدنيادى سنين وشهور
كافح واتعَب واسهر وامشى لازم تنجح لو ما تنامشى
دنيا لذيذه و زىّ السُكر ايه بيضايقك ف المكتوب؟
*************
أصل الدنيا يا صاحبى جميله تعبى و تعبك سرّ جمالها
و الأيَّام بتمُرّ طويله لو ما حاولتش يوم تشغلها
ماتكسِّلش الرزق يجيلك ولا تكرهش الخير لزميلك
مش ح تلاقى الدنيا سئيله ولا تتضايق م المكتوب
====================================================
(16)
يا ناسينى
*********
يا ناسينى و ناسى كمان ودَّك يا مزوّد حيرتى بطول بُعدَك
إرحمنى امَّال و كفايه دلال
إعمِل معروف أنا مش قدَّك
************
يا ناسينى وقلبك مش راضى وعنيك يا جميل كشفت حبك
راح تنسى ازاى المَرَّادى دى عهود بين قلبى و بين قلبك
هُمَّه الأحباب يا جميل يرضوا تشمت عزال فيهم برضُه؟
إرحمنى امَّال و كفايه دلال
إعمِل معروف أنا مش قدَّك
************
إعمِل معروف علشان خاطرى إنسى الهجران دانت حبيبى
وانا برضه حبيبك طول عمرى ح ينوبك ايه من تعذيبى ؟
هُمَّه الأحباب يا جميل يرضوا تشمت عزال فيهم برضُه؟
إرحمنى امَّال و كفايه دلال
إعمِل معروف أنا مش قدَّك
************
مش قَدَّك أبدا ف عنادك مقدَرش اهواك واعمل ناسى
بقى دا اسمه كلام يبقى فؤادك مشغولبى وانت تكون قاسى؟
هُمَّه الأحباب يا جميل يرضوا تشمت عزال فيهم برضُه؟
إرحمنى امَّال و كفايه دلال
إعمِل معروف أنا مش قدَّك
************
=====================================================
(17)
على قِمِّة حارتنا
************
على قِمِّة حارتنا مِ الناحيه اليمين أنا وانت اتواعدنا من قيمة يومين
ولا جيتش تقابلنى وغيابك شغلنى
و كأنَّك فايتنى بقالك سنين
***********
على قِمِّة حارتنا والناس رايحه جايَّه وكل اللى فايت بيشاور عَلَيَّه
و يقول ده حبيبه ماجاش ف المعاد وانا واقف وحيرتى مرسومه ف عِنَيَّه
وطال انتظارى واحتار الفؤاد والقلب اللى حَبَّك مستنى المعاد
ولا جيتش تقابلنى وغيابك شغلنى
و كأنَّك فايتنى بقالك سنين
***********
أنا وانت اتعاهدنا على حب و حنان وف يومها اتواعدنا نتقابل كمان
وسيبتك لقلبك يحدد معادنا وقالت عيونك فى نفس المكان
وطال انتظارى واحتار الفؤاد والقلب اللى حبك مستنى المعاد
ولا جيتش تقابلنى وغيابك شغلنى
و كأنَّك فايتنى بقالك سنين
***********
=====================================================
(18)
دلع الحلوين
***************
دلع الحلوين زاد عن حَدُّه حيرنى يا ناس وانا مش قدُّه
بقى دا اسمه كلام يبقى حبيبى واكمنه جميل يتقل برضه؟
*********
كلمت الناس عن هجرانه وسألت علِيه كل جيرانه
وصيتهم لو عدَّى عليهم يحكوله عن حيرتى عشانه
وشكيت للأهل وللحاره ولا مره اتعطَّف بأشاره
بقى دا اسمه كلام يبقى حبيبى واكمنه جميل يتقل برضه؟
*********
ع القِمَّه هناك مَرَّه قابلته و حاولت اتكلم وسألته
إيه أخرة دلعه و دلاله راح باصص من طرف ملايته
مارضيش يجاوبنى على سؤالى غير هيَه البسمه بعتهالى
بقى دا اسمه كلام يبقى حبيبى واكمنه جميل يتقل برضه؟
*********
الفاتحه قعدنا و قريناها والشبكه كمان قدمناها
ليه يتقل بقى أو يتدلَّع؟ ماخلاص حكايتنا فهمناها
كان واجب يسأل ويسلم و يردّ علَيّه امّا اتكلِّم
بقى دا اسمه كلام يبقى حبيبى واكمنه جميل يتقل برضه؟
*********
=========================================================================
(19)
صراحه
********
صراحه .. قلبى حَبَّك ْ صراحه .. وانشغلبكْ
وزاد الحب اكتر من يوم ما سكنت جنبك
صراحه
********
أنا عشت العمر خالى ولا حدِّش كان ف بالى
من يوم ماشفتك انت ماعرفتش ايه جرالى
حسيت انى هويتك ومشيت وراك لبيتك
ولقيت قلبى اللى حَبَّك حيرنى وانشغلبك
صراحه
********
دَوِّبنى السِحر ياما دَوِّبنى بابتسامه
ولقيت ف عنيك ساعتها لهواك مليون علامه
طمِّنْت القلب بيهم ومعانى الحب فيهم
خلتنى اتمنى قربك وجابتنى سكنت جنبك
صراحه
********
يا جارى خلِّى بالك من عاشق جه قبالك
ساحراه نظرة عيونك حيران قلبه ف دلالك
صَرَّح له بكل حاجه لو سألك و الاَّ حاجه
خليك ويَّاه بقلبك دا حَبَّكْ و انشغلبك
صراحه
********
=================================================================
(20)
قول و اللهِ؟
***********
لأ مش ممكن .. إنت بتضحك بطَّل مرَّه العِند يا ساهى
يعنى أسامحك؟ يعنى أصالحك؟
جَدّ كلامك؟ قول واللهِ
*************
يعنى بتندم على هجرانى؟ يعنى الحب ف قلبك لِسَّه
خايف اصدَّق ترجع تانى زىّ عوايدك برضه و تقسى
قول يا عنيد ما تحيرنيش قول بصراحه ما تشغلنيش
يعنى أسامحك؟ يعنى أصالحك؟
جَدّ كلامك؟ قول واللهِ
*************
شفت كلام الناس وسمعته شفت ازاى كان ح يفرقنا؟
أنا مش عارفه ازاى صدقته وانت عارفهم ، دُول عُزَّالنا
كانوا حبايب ليك وانا عارفه قول اتكلم والله انا خايفه
يعنى أسامحك؟ يعنى أصالحك؟
جَدّ كلامك؟ قول واللهِ
*************
يعنى خلاص ح تكلم ابويا؟ يعنى الحلم ح يبقى حقيقه
بس كمان روح قابل اخويا هوَّ لطيف اخلاقه رقيقه
دغرى ح ييجى ساعتها يقوللى واعرف يومها انك حتكون لى
وابقى أسامحك وابقى أصالحك
وَ ابقَى اطَّمِّنْ قوى والله
======================================================================
(21)

******************
ما خلاص الفكر شَغَلته والقلب معاك حيَّرته
ماتروح وتقابل ابويا ح يوافق لو كلمته
************
معروف عنك م الأول طول عمرك شهم و طيب
وصنايعى ولك مستقبل ومفيش حاجه فيك تتعَيِّب
والأب الحُرّ العاقل يفرح لو ناسب عامل
ماتروح وتقابل ابويا ح يوافق لو كلمته
************
ح نشارك بعض ف بيتنا و نأسس كل لوازمه
وكفاحنا ف كل حياتنا ح نعيش دايما نتقاسمه
دى بلدنا ومحتاجه لينا والبيت له حق علينا
ماتروح وتقابل ابويا ح يوافق لو كلمته
************
الدنيا ح تبقى جميله طول م احنا بنتعب فيها
و ح نصبح أسعد عيله وقلوبنا الحب ماليها
ح نعيش ف سعاده تمللى وانا قلبى دليلى وقاللى
ح تروح وتقابل ابويا و يوافق لو كلمته
=========================================================================
(22)
إبقَى قوللى
**********
اللى قالَّك بُكرَه تِنسَى عمر قلبه ما حَبّ لِسَّه
رُوح و طاوعه.. رُوح يا قاسى بُكره يا ما راح تقاسى
لمَّا اشوف ازاى ح تنسى
*********************
بُكره تندم ع اللى فاتنا فى اليومين الصعب دُول
لمّا تتبدِّل حياتنا لمَّا ليل الشوق يطُوْل
والعذاب اللى انت جايبُه للقلوب لاتنين و سايبُه
بُكرَه نارُه تزيد يا قاسى ياما مِنُّه راح تقاسى
لمَّا اشوف ازاى ح تنسى
****************
ياللى عايش ف الخيال ياللى عايز تنسى حبك
دا الفراق لو حتى طال كل مادا يحن قلبك
وانت مهما تكون عنيد والاَّ مهما تروح بعيد
قلبى حاسس بيك يا قاسى بُكرَه ياما راح تقاسى
وابقى قوللى ازاى ح تنسى
================================================================
(23)

*********************
زَعَلكْ قرَيِّب ليه ؟ و بسرعه تغضب ليه؟
خلِّيك طويل البال خلِّيك معايا امَّال
مش برضُه دُول أولادنا؟ مش مهما كان أطفال؟
لو قالوا كلمه بْتِزْعَلْ وتسيبنا دثغرى و تِنزِلْ
أُمَّال انا اعمِل إيه؟
**********
تِرجع يادوب من شُغلَك ملهوف قوام ع الطاوله
والقَى اللى جاى يندهلك واحنا بْوجودَك أَوْلَى
تِنزل معاه على طُوْل وِفْ كُلّ مَرَّه تقول
دا يادوب غالبنى امبارح واسيبه مش معقول
وتقول باهرب م الدَّوْشَه ح اقعد فِ زعيق و مناوشه
أُمَّال انا اعمِل إيه؟
**********
بقى يعنى القهوه بحالها دوشتها ماهيش تاعباك
والكلمه اللى احنا نقولها بتضايقك مش عاجباك
عَلِّمْنى الطاوله ألاعبك و معانا ح تنسى متاعبك
أو ذاكر يوم لولادنا دُول هُمَّه أَعَزّ حبايبك
أقعُد ويّانا ساعِدنا و بوقت فراغك فينا
واتفرج ح اعمل ايه
======================================================================
يبقى مين؟
*********
يبقى مين الحلو ده؟ حدّ يعرف يبقى مين؟
شُفته من كام يوم كِده دُغرى حسِّيت بالحنين
نفسى اروح له نفسى اقول له
إنت يا اسمر تبقى مين؟
**********
جاى بيُخطُر مِن بعيد زى غزال فرحان سعيد
السهام مش قادره مرَّه تيجى يَمُّه أو تصيد
الغرور باين عليه والجمال جُوَّه ف عِنِيه
زادنى لهفه و شوق إليه زاد غرامى بالحنين
نفسى اروح له نفسى اقول له
إنت يا اسمر تبقى مين؟
**********
إنت يا اسمر ياللى ماشى ياللى حُسنك ماتوَصَفشى
قول عشانك أعمل ايه واللى تؤمر بيْه ح يمشى
رُدّ ما تحيَّرش قلبى قوللى يا اسمر ليه تخَبِّى؟
مين أروح اشكي له حبى؟ مين أبوح له بالحنين؟
نفسى اروح له نفسى اقول له
إنت يا اسمر تبقى مين؟
**********
========================================================================
(28)
جدعان جيهتنا
*************
قولوا لموج البحر يِهْدَى شوَيَّه قولوا يا نسمه هفهفى بحِنِّيَّه
جدعان جيهتنا الصبح بدرى معادهم نازلين يجيبوا الخير لنا بِشباكْهُم
وانا لِيَّه بينهم حُب غالى علَيَّه
**************
جدعان جيهتنا الله يقوِّى الهِمَّه متوكلين من بدرى ع اللى خالقهم
شَدُّوا السواعد و بإيمانهم هُمَّه مِتعَشّمين ف الله كريم يرزقهم
يا موج أمانه تكون حنَيّن حَبَّه ترتاح قلوب مليانه شوق و محبّه
و يعودوا لينا ينورولنا الدنيا
*************
أنا ليّه بينهم فرحتى و هنايا و شريك حياتى اللى بحنان مراعينى
دا حبيب حياتى و هوَّه كل منايا هوَّه اللى فاتح بيتى و مهنّينى
عايزاه يا نِسْمه يهِلّ زىّ عوايدُه مجبور و راضى و ربنا من عنده
مِدّيه على قّدّ الضمير والنيَّه
=================================================
(29)
مجنون
*******
مجنون مجنون بس شاريكى مجنون مجنون حَد شريكى؟!
وان جيتى للحق انا مش مجنون أنا ييجى مِتِين مليون مجنون
لَكن بيكى
********
مجنون و جنونى مفيش مِنُّه و هواكى أشعاره وْ فَنّه
و انا عايش بيكى معاه فِ نعيم مهما ابعد عنّك فيكى أهيم
و احلم و اتمنّى أشوفنى زعيم على كلّ الناس اللى اتجَنّوا
و جنونى بيكى
********
مجنون و جنونى مفيش منه والناس عرفوه قوى إكمِنّه
فوق كل عقول اللى شافونى ولا يوم بِدوا الصبر شفونى
مجنون و عاجبنى قوى جنونى وانا م استغناش أبداً عَنّه
علشان بيكى
********
أنا أسعد مجنون بجنونى بيكى حلاّ العالم ف عيونى
و انا شايفك فيه دنيتى و الناس وانا عايشك بِيه أجمل إحساس
يا قمر فِ ظلام الكون ونّاس يا عيون حلوين مِنّى خَدونى
و رمونى فيكى
********
دا جنون إخلاص مش لُقا و خلاص دا جنون مايجيش لحبيب هجّاص
على قَدّ هوايا جنونى أكيد يِفرِس عُزَّالنا أكيد و يكيد
و انا نفسى أكون فِ جنونى وحيد تحضنى قلبى بحُب و إخلاص
و أدوب فيكى
********
كل المجانين ناس تَرَلَلِّى و انا بَسّ اللى جنونى تجَلِّى
عقلى بيتحَدَّى حنين قلبى بالفِكر ف قربك و ف قربى
مين فيهم عاش أكتر حبى؟ لاتنين ف سباق عشق تمللى
لكن ليكى
********
مجنون و العقل فَلَت مِنى راح عندِك لاجل يطمّنّى
قال ايه راح يرجع يوم قربِك قال ح اعقَل وَاهدَى وانا جنبك
دانا لو عاقل حتّى ف بُعدِك قربك دا لوحده يجننى
ويقولوا مجنون لكن بيكى و أعيش مجنون بسّ شاريكى
وان جيتى للحق انا مش مجنون أنا بيكى مِتِين مليون مجنون
حَدّ شريكى ؟!
=========================================================================

(37)
مِن غِير مواعيد
***************
من غير مواعيد يومها قابلتك وارتاح لك قلبى و كَلِّمْتَكْ
وبتبعد.. لِيْه؟ م تقول جَرَى إيه
لو كان البعد ف مصلحتك يكفينى يا غالى انى عرفتك
**********
أنا يوم ما قابلتك و لقيتك فكرت الدنيا ح تضحكلى
والبال ارتاح بَسّ ياريتك حسِيت و انا يومها اتهيَّألى
إنّ انت كمان قلبك مليان
إحساس بشعورى وصدَّقتك
**********
أنا عشت العمر ماحبيتشى غير لما عنيك جت ف عيونى
و ياريتك يومها انت ماجيتشى ولا شفت عنيك ولا شغلونى
م انا هُه محتار عايش على نار
و مضحى مادام فيها سعادتك
=====================================================
(38)
أيْوَه ح انسَى
***********
أيْوَه ح انسَى وانتَ إنسَى واوعَى تِنسَى
إنك انت اللى ابتديت

يعنى فِكرَك أَبقَى فاكرَك و انت فِكرَك
وىَّ غيرى أو نسيت؟
**********
إتواعِدنا و اتعاهِدنا وكان شُهُودنا
بَسمه حلوه و نظرتين

ياما قلنا عن أملنا كان ف بالنا
حُبِّنا ح يعيش سنين
وانت ياما كتير حكيت
**********
قوللى مالَك إيه جرالك؟ مين ف بالَك
غَيَّرَك وَدَّاك بعيد

كُنت جنبى كنت حُبِّىْ و مش ح اخَبِّىْ
بَعد بُعدَك إيه يفيد؟
بُكرَه ياما تقول ياريت
=========================================================

(42)
منولوج
النون و الحه والسين
*****************
النون و الحه والسين يكفيكو شرُّه يا سامعين
من يوم ما عرفنا بسلامته من يومها بقينا مساكين
م النون و الحه و السين
*********
كان واحد مِننا بيتاجر و يبيعلك فيتامين و حديد
فيتامينه كان حلو وراور و مرعرع مفعوله أكيد
جُمْ عَبُّوا الفيتامين فِ قزايز بالحُقنه يفضُّوه فِ وريد
جرجيره و فجله بقى بايظ من يومها بقينا مساكين
م النون و الحه و السين
*********
و التانى يا ساده كان مطرب و بيحيى حفلات وافراح
و حقيقى كان صوته بيطرِبْ و بسببه طلعت أرواح
وف حفله كان جاىّ مفرفش بيغنى لكن صوته راح
غَنّى بداله عَمّكْ جنِّش من يومها بقينا مساكين
م النون و الحه و السين
*********
أمَّا التالت حالته عجيبه كان فاتِح كُتّاب بالليل
جاتلُه فْ مَرَّه خالتى رتيبه و معاها المحروس سى نبيل
قال عاوزه ابنها لازم يطلع مكانيكى ويسوق تروبيل
فهِّمْهَها كتير وياريت ينفع سابهولها و بقينا مساكين
يكفيكو شره يا حاضرين
النون و الحه و السين
==============================================
الفول
*****
الفول يا ناس له مِيْت مفعول وفِ التراث بان من بدرى
وان مَرّ يوم من غير رؤياه ماينحسبشى من عمرى
*******
من حِيث ملامحه و أشكاله فِ ألف صنف بيتنَكّر
لو ناوى تتأمل حاله بلاش لا دمك يتعكر
خدها نصيحة مدمن فول كلامى مش راح يتكرر
كُلْ و احسد المحروم منه وأوعى ف اللحمه تفكر
*******
ساعة الفطار تلقاه جايلك طبق مدمس زىّ اللوز
لقمه و ترميها فْ بُقّك ترُوْح لشغلك زىّ الكُوز
مليان لحبّة عينَك فول وللزباين ضارب بوز
وان حد تقضِىْ مصلحته يكون صحيح إنسان محظوظ
*******
ساعة الغدا تِرجَع بيتك و راس جنابك مِنداره
إيه يا ترى طابخه مراتَك عشان تعَوَّض دى خساره؟
تلقى المفاجأه مُوْنِة فول و إسمُه فِ الفِقه بْصاره
تِلْهَط طبَق تِبْقى مْتنّح يومين ما تنزلش الحاره
*******
أمَّا العَشا ما تَّقّلشى ، و مِ الفلافِل كُلْ قرصين
وان كنت ح تنام ماتقومشى ح تكون مع ذنوبك خالصين
دا الشخص مِنَّا واكِلْ فول فِ حَجم مُوْنِة سور الصين
و الجنّه لوْ بيْه ندخلها يكون دا حظ المصريين
*******
يا هل اللحوم جالكو النقرس و تخن فيه الناس عابت
خِفوا اللحوم دا الفول أحرَص على البدن ، جالكم خابط
عودكو الحصادى يشهدلى و نظرتى ما ف يوم خابت
إن يوم عييتوا الطب يقول دواكو تاكلم فول نابت
===============================================

كان مالى
*****
كان مالى و مالك يا اسمر خليتنى ليلاتى أسهر و عيونك ما كات ع البال
لو ح اوصف هواك مش ح اقدر و الضحكه اللى زى السكر خلت والله حالى حال
***
يا اسمر نفسى أوصف حبك و العمر اللى عشته بقربك و عنيك اللى سحرانى
بس اوصف و اقول إيه عنك مين اقدر أقول فيه حسنك وف حسنك ماشفتش تانى
***
و الشعر الحرير فوق خدك خلانى اقول مين قدك إيه ف الحسن راح يتقال
و القلب اللى عاش يخلصلك دايب فيه غرامك وحدك وف حبك مالهش مثال
كان مالى و مالك يا اسمر؟
====================================================== قِسمَه
*****
صدفه سنيوره مره قابلتنى شفت رقتها سحرها خدنى
رمشها جارح ع القلوب سارح عينها بتقوللى ياللا نتصارح
قلت يا دنيا بيكى ح اتصالح لو أكون ليها بس توعدنى
*****
شفتها صدفه و قلبى كان خالى بس فيه لهفه مش على بالى
شفتها اتحير ، بالهوى اتغير بعد أوهامه .. بالهنا نوَّر
خفت من قلبى يبقى متهوَّر قلت له منك اللى يجرالى
*****
نظره و التانيه بعدهم بسمه خلوا نار قلبى صيف و فيه نسمه
طمِّنِت قلبى و الأمل جانى غنت الدنيا وىَّ أشجانى
قلت يا فرحه أوعِى تِنسِينى قالت الفرحه دا الهنا قسمه
===================================================
(66)
بَحِبَّكْ
******
بحبك حب خلانى احس بإنى وحدانى
ما بين أهلى و خلانى ما دمت انت بعيد عنى
*****
دا قربك منى له فرحه بتبقى ع الوجود سارحه
و أشجار الأمل طارحه فِ ساعة القرب ده منى
*****
و لو ع البعد له قسوه و حيره و دنيا ما تسوى
و نار من شوقى لك تقوى و اعيش للقرب مستنى
*****
بلاش نبعد و لو ثانيه دا قربك منى بالدنيا
و احس بروحى و عْنَيَّه و قلبى و هوَّه متهنى
*****
بحبك حب م اقدرشى على وصفه و معرفشى
عِنَيَّه لِيه ما بتنامشى ف بعدك واسأل النِنّى
*****
تبص ف عينى ح تقولَّك كلام من قلبى ح يدلَّك
على الحب اللى مخلوق لك، و قربك .. لما طمنّى
====================================================
الفراق
******
الفراق ..
دابت الأيام معانا ف الفراق
و لْلُقانا الدنيا عاشت ف اشتياق
و اتقابلنا ف أحلى صدفه بأغلى حب
و اللقا خلا السعاده ف كل قلب
لكن العزال يا روحى حيروك
بالخيال و الوهم قدروا يغيروك
وف ثوانى إتنست كل الوعود
و افترقنا و انتهت أجمل عهود
كنت فاكر دنيتك لك راح تدوم
والاَّ غيرى يعوضك عن حبى يوم
ليه تخليك المظاهر يوم تخون ؟!
دا الحنان ما تعوضوش أموال قارون
مين يبيع قلبه و حبه يكون كبير ؟!
هوَّه لولا القلب كان يبقى العبير ؟!
*****
جاى تقول البعد كان حيره و مرار
و الندم كان كاوى قلبك ليل نهار
و الحنان كان ف البعاد عنك بعيد
و النهارده .. ناوى ترجع من جديد
جايلى تانى و قلبى لسه الجرح فيه
مهما تندم .. الندم مش ح يداويه
دا لحبيب لو كات جراحه م الحبيب
يقضى عمره ف الألم ما يفيد طبيب
بس حبى ف قلبى بيزيد يوم بيوم
زى زمان ما يهمهوش لايم يلوم
و اساَل الليل و القمر عن حبى ليك
ح يقولولك قد إيه باشتاق إليك
بس قلبى مهما سامحك يوم و راق
مش ح ينسى انك رضيت يوم بالفراق
==================================================
(69)
شُفتك بقلبى
*********
من يوم ما شفتك بقلبى وليالى عمرى هنيَّه
و عرفت بيك معنى حبّى يا أحلى دنيا ف عِنيَّه
من يوم ماشفتك بقلبى
*
طولت ف السهد ليلى بين النجوم و الأمانى
نجمه ف ضياها تناديلى يلقاها صورتك حنانى
يا ليالى عمرى الهنِيَّه يا أحلى دنيا ف عِنَيَّه
من يوم ما شفتك بقلبى
*
جنة هواك فين نعيمها غير جوه قلبك يا غالى
قبلك ماكنتش راسمها غير ف الأمانى و خيالى
و لقيتها فيك و انت بيَّه يا أحلى دنيا ف عِنَيَّه
من يوم ما شفتك بقلبى
*
ح افضل أحبك لوحدك مخلص و صاين ودادك
بس انت صون فِيَّه عهدك و اوصل لغيرى عنادك
ماهو انت بس اللى لِيَّه يا احلى دنيا ف عِنيَّه
من يوم ما شفتك بقلبى
=======================================================
(70)
مهما احكيلك
***************
مهما احكيلك ع اللى ف قلبى مقدرش اوصف شىء من حبى
فرحه نقول عنها مهما نقول نقدر نوصفها ؟ مش معقول
مهما احكيلك
*
نظره ف كلمه لقينا قلوبنا دابت وىَّ الحب و دُبنا
و الأيام أهى ضحكت لينا و الدنيا احلوت ف عنينا
غنت بالفرحه و غنينا و الألحان من دق قلوبنا
*
بعيونَّا القلبين اتعاهدوا ع الحب بأحلامه و سهده
و الأيام لو ضاقت مَرَّه راح تحلا بإخلاصنا المُرَّه
و اللى احلى من امبارح بُكْرَه طول م الحب بنحفظ عهده
*
لمّا أديك تحضنها أدَيَّه بَشعُر إن ف إيدى الدنيا
بالقى الفرحه بتجرى ف دمى و انى ف قربك حيرتى و همى
و العزال من عينها نسمى ع اللى ف قلبك من حنيَه
*
بَسمَع صوتك ، قلبى يغنى موال القلب المتهنى
يحكى لكل الناس قصتنا و بيوصف ليهم دنيتنا
جنه و مين يوصف جنتنا ف الدنيادى أكتر منى ؟!
*
حبك أكبر من أوصافه أجمل من صورته و أطيافه
اللى الناس قدرت توصفها و اللى عقول الناس تعرفها
لكن مهما احكى اللى ف قلبى مقدرش اوصف شىء من حبى
فرحه نقول عنها مهما نقول، نقدر نوصفها ؟ .. مش معقول
مهما احكيلك
======================================================
حبيبتى اسكندريَّه
****************

حبيبتى اسكندرية عروسه مرمريه
على البحر ملاليه يا محلاها الماريه
حبيبتى اسكندريه
*
فردت القلب فوق شَطّك يساعى الناس فِ أحضانِك
نسجت الحلم ضليلتك غزلت بحبى وجدانك
يا طلعة رزق فجريه يا فسحه فْ وقت عصريه
يا روح شفافه مصريه على البحر ملاليه ..
حبيبتى اسكندريه
*
ما بين الشط و الميه سنين العشق مقسومه
و حسنك ميه ف الميه ملامحه ف عينى مرسومه
لا بتفارقينى ف الغربه و لا ف قربك ولو حبه
يا نبع الألفه و الصحبه على البحر ملاليه ..
حبيبتى اسكندريه
*
نادانى البحر ف عيونك و انا الملاَّح ف أشواقى
فردت شراعى ف جفونك رميت شبكى لأرزاقى
طرح لى البحر أسراره و جابه الموج بأخباره
بلهفه ف سرها احتاروا حبايبى .. قلت هِيَّه
حبيبتى اسكندريه
========================================================
(73)
يا وطن
*******
حطم غرور المستحيل زلزل عناد روس الفتن
و اوصل كفاح كام ألف جيل بأدين عزيمتك يا وطن
*
جدد لنا دم الولاد ، يبقوا رجال وقت المحن
دى التضحيه ف حب البلاد سر الخلود طول الزمن
و لا أمر واقع نقبله و لا حق لينا نهمله
و كفاحنا لازم نوصله بالحب وىَّ الإتحاد
و اشهد علينا يا وطن
*
مش طبعنا نخون بعضنا و لا طبعنا نكون معتدين
و لا يوم نخالف عهدنا و لا غدر بيه متعودين
و احلف و انا عندى الدليل إن اللى عن قوله يميل
عمره ما كان عربى أصيل يحمى دمانا و عرضنا
و اشهد علينا يا وطن
*
أحلف بحق المصطفى إن اللى ضاع لازم يعود
و العدل لو بينَّا اختفى ح يطبقه رب الوجود
دا الصبر ع العدوان دمار و الصمت ع المحتل عار
تمحيه دمانا و روح و نار و الحق نوره ما ينطفى
و احنا عزيمتك يا وطن
======================================================
من غير إنذار
*********
من غير إنذار تبعتيهولى و عتاب و كلام ح تقوليهولى
قلبى الغيار غيرك م اختار ليه بقى نحتار؟ .. قلبى دليلى
من غير إنذار
*****
أنا كنت الكون وانتى الدنيا و حياتى و أحلامى الجايَّه
و العالم بقى ملك أدينا نحلم ، تتحقق أمانينا
و قلوبنا ترفرف فى عنينا و الشوق مايسيبناش ولا ثانيه
قلبى الغيار غيرك م اختار ليه بقى نحتار؟ .. قلبى دليلى
من غير إنذار
*****
إفرحى بلقايا و انا معاكى دى حياتى بتكمل بلقاكى
و الفرحه و ألوانها و نورها و نجوم الليل وَىَّ سهرها
مين غيرى ف حبك حيَّرها ؟ إسألى قلبك تلقى هواكى
قلبى الغيار غيرك م اختار ليه بقى نحتار؟ .. قلبى دليلى
من غير إنذار
====================================================
(77)
شغلت بالى
***********
شغلت بالى و فكرى احتار من كتر حبى ليل و نهار
بشوف خيالك يشغلنى و مشيت معاه مليون مشوار
فيها الأمانى بتهنالى و اتمنى إنك تبقالى
عشان الدنيا تحلالى و ارتاح معاك من دى أفكار
*****
صبحت عقلى و نور قلبى و دنيتى و روحى و حبى
و مادمت تتمنى وصالى ، اتمنى اشوفك يوم جنبى
منايا إنت و أحلامى و عمرى و الشوق و هيامى
لمين سايبنى ف أوهامى بعدك تزيد وَىَّ الأفكار
*****
إزاى أعيش من غير حبك يا معنى عمرى و دنيايا ؟
دا احب من غير مايكون لك يكون ضنينى و أسايا
و انا قلبى عاش صاين قلبك و له معاك أحلى حكايه
و يوم ما تبعد يهرب لك و تطَوّل الحيره معايا
و افضل مع الأفكار محتار
===================================================
(78)
مش كتير
********
مش كتير عليك أحبك أو يعيش قلبى بحبك
م انت أغلى ما ف حياتى و الأمل أتهنّى جنبك
ياللى لو زوّدت بُعدك بالقى قلبى برضه عندك
وَىَّ كل الشوق لقربك وَىَّ خوفى الحيره بَعدَك
مش كتير عليك أحبك
أو يعيش قلبى بحبك
*****
مش كتير عليك أقولَّك أىّ كلمه بمعنى أقوَى
مش كتير كلمة بحبك و انت اغلى كلمه حلوه
مش كتير لو هِمت يوم بَك م انت لحن لأحلى غنوه
غنوة القلب اللى حبك من سنين أوَل ما شفتك
مش كتير عليك أحبك
أو يعيش قلبى بحبك
*****
إنت تِهْنَى بيك حياتى وف هواك بتهون أهاتى
و انت نور عينى و نهارى و انت أحلامى ليلاتى
و انت لولا صنت حبك كنت مش ح القاك ف ذاتى
جوَّه قلب بحبه جاوبك و انتظر م القلب رَدَّك
مش كتير عليك أحبك
أو يعيش قلبى بحبك
*****
أطلب العين أديهالك و انت جوَّه عنيه نورها
أطلب الروح اهديهالك و لحياتى إنت روحها
نَفسِى مِنّك .. من جمالك و انت جوَّه النفس خيرها
عمرى جنَّه نورها ضيَّك و انت مين ف الدنيا زيَّك؟!
مش كتير عليك أحبك
أو يعيش قلبى بحبك
=======================================================
(79)
أغلى م الوجود
***************
ياللى حبك عندى أغلى من حياتى و الوجود
بالأمل وياك بتحلا دنيتى من غير حدود
*****
قلبى ياما اشتاق لنورك عمره يوم ما حب غيرك
ياما عاش طيفه بعبيرك و الحياه بستان ورود
و انت حبك عندى أغلى من حياتى و الوجود
*****
لما بعدى يطُوْل عليك و الفؤاد يشتاق إليك
بالقى قلبى بيناديك يا حبيبى لِيَّه عُوْد
دا انت حبك عندى أغلى من حياتى و الوجود
*****
ياللى حبك نور لعينى فيه امانى و فيه حنينى
شوفنى جواك ح تلاقينى بيك باصون أغلى العهود
م انت حبك عندى أغلى من حياتى و الوجود
===================================================
(80)
ليه تلومنى؟
**********
ليه يا غايب عن عنيَّه ترضى لِيَّه بالأسِيَّه
لما تظلمنى بظنونك و انت أغلى الناس عَلَيَّه
*
يوم ماشفتك كان ميلادى و ابتديت ف عنيك حياتى
و الحنان من جوَّه قلبك كان هنايا و كل زادى
*
ليه ظالمنى وانتى منّى جوَّه عينى نور و ننّى
روحى نفسى كل عمرى هُمَّ إنت .. ليه تلومنى؟!
*
لما اعيش أتمنى قربك و اطلب اقضى العمر جنبك
تفتكر كان ليه دا كلّه غير لحبك و لغلاوتك
===================================================
السمره مين؟
************
بيقولولى السمره مين اللى قلبك فيها دايب
و اللى بنشوف الحنين نبع منك ليها سايب
بيقولولى السمره مين؟
*****
لو تحبوا تعرفوها بصوا ف عنيَّه تشوفوها
صوره حلوه للأمانى لحن أجمل للأغانى
سر أشواقى و حنانى و اللقا بعد الضنين
و تقولولى السمره مين؟
*****
هِيَّه فجر بعمرى طالع هيَّه طِير هاجر و راجع
هيَّه نسمة صيف و ضِلُّه هيَّه فرحة عمرى كلُّه
القمر لو كات تقولُّه : مَطرَحَكْ .. ينزل حزين
و تقولولى السمره مين؟
*****
هيَّه كلمه و ليها مَعنى هِيَه ضِحكه بين دموعنا
هِيَّه أيَّامى اللى جايَّه و الهيام لو بان عَلَيَّه
و الدَفا و الحُضن هِيَّه هِيَّه طِيْبَه و طَيِّبين
و تقولولى السمره مين؟
=====================================================
(86)
خِفـَّه وْ أسمَر
***********
خِفه و أسمر دَمَك سُكّر مين يا جميل على حسنك يقدر
تتقل ليه و تطوّل بُعدَك و تسيب قلب هواك يتحيَّر
علشان يعنى م َ لونك أسمر؟
*****
قبلك ياما عيونى خانونى لعيون غيرك ياما خدونى
و انت عشان حاسس بغلاوتك قاسى و تقلك سر قساوتك
ياما داريت عن عينى حلاوتك و انا ف العالم كله بادَوَّر
على روحى و محبوبى الأسمر
*****
ياما سهرت معاك ف خيالى أجمل عمر خطر على بالى
و اما لقيتك قدَّام عينى بالشوق و الأفراح بتجينى
حبّيتك ي اسمر و اتارينى عشت هوايا فوق م اتصوَّر
ف حنانك وف حُبَّك ى اسمر
*****
مين حَبَّك فِ العالم قدِّى ؟ مين ى اسمر بيودَّكْ وِدِّىْ ؟
إسأل نفسَك تعرف حُبِّىْ والاَّ اللهفه ف دقّات قلبى
لَمَّا بَشوفك ى اسمر جنبى بالبسمه و بالخِفـَّه السكر
و بْسِحرَكْ يا حبيبى يا أسمَر
*****
بستناك تعشق و تقدَّرْ و القاك على أحلامنا بْتِقدَر
بستناك تِوْصِلنى بْحُبَّك و بسِحر كلامك من قلبك
و بحِنيَّه ما كانت قبلك غير أحلام فِ خيالى بتِكبَر
بغلاوتك و بحُبَّك ىَ اسمر
==================================================
(87)
وحشتينى
********
وحشتينى و بحلف باللى جَمَّعنا
و بعيونِك و بالحب اللى له معنى
يا روح قلبى وحشتينى
*****
تواعدينى .. وأستنَّى و ابُصّ فْ ساعتى و اتمَنَّى
يفوت الوقت و يعَدِّى ألاقى الثانيه بتهَدِّى
و اعيش ملهوف عليكى كتير و ألقاكى .. وحشتينى
*****
يطول بعدك و انا صابر و اقول البعد له آخر
و مهما يقولوا بِايعانى و الاقى القلب بيعانى
ألاقى الشوق مالهش كبير و بالقاكى .. وحشتينى
*****
و تيجى بْبَسمِتِك صافيه و نظره بالحنان دافيه
ادوب منهم و م الأعذار و أنسَى لوعة الأفكار
و الاقى فْ حبنا التفسير دا غير إنّك وحشتينى
و بحلف باللى جَمَّعنا و بعيونك
و بالحب اللى له معنى ياروح قلبى
وحشتينى
========================================================
(88)
يصعب عَلَيَّه
*************
بتعز نفسك عَلَيَّه و انا اللى معرفش غيرك
و تعذب الدنيا فِيَّه و انت اللى مرتاح ضميرك
مالك بطيفك خيالى و لا انت دارى بحالى
و شوقى و اللى جرالى وصفه بيصعب عليَّه
*****
تشوف عيون العوازل مليانه فرح و سعاده
و دمعى من عينى نازل يروى فرحهم زياده
و انت اللى رخصت دمعى و اديت لغيرك مسامعى
تسمع كلام اللى ينعى و لا انت عن قلبى سائل
*****
إياك تفكر دموعى موجه ف بحور اشتياقى
أو إن مركب خضوعى تملكها يوم التلاقى
بس انت صعبان عليَّه خايف لاتبقى الضحيَّه
أصل الندم لو شويَّه ما تقيدش ناره ضلوعى
وتعز نفسك عَلَيَّه و انا اللى معرفش غيرك
و تعذب الدنيا فِيَّه و انت اللى مرتاح ضميرك
=================================================

(90)
بعد إيه ؟
********
جاىّ تانى تفتكرنى بعد إيه ؟ جاىّ تبكى وتعتذرلى تانى ليه؟
قلبى ياما اشتاق لِيُوم تعطف عليه و اما بان حبه غدرت ف ثانيه بيه
و التقيك جاى تفتكرنى؟
بعد إيه
*****
إمتى كان الحب زارك لمّا تيجى باعتذارك
بعتنى لما اشتريتك سيبتنى لما ناديتك
و النهارده من غرورك جاى فاكرنى ف انتظارك
بعد إيه
*****
ياما سامحتك زمان و افتكرتك لك أمان
قلت بُكرَه تصون هوايا و الحياه ح تكون معايا
ياللى كان وصلك منايا قوللى ضيعت اللى كان
تانى ليه؟
*****
إنسى حبى و يوم لقانا و الأمانى اللى ف هوانا
النهارده بس بيعتك بعت قلبى برضه بعدك
و احنا أغلى الناس ف بعدك إيه على القسوه رمانا؟
مهما تيجى تقول فاكرنى و الاَّ تبكى و تعتذرلى
لو أسامحك و الاَّ اصالحك
بعد إيه؟
======================================================
(91)
مش بأدَيَّه
********
مش بأدَيَّه أكون أوناسيس لاجل افرشلك عمرى حرير
انا م املكشى غير أحاسيس أكبر من حلمك بكتير
مش بأدَيَّه
******
عمرى قضيته ف شوك و ورود و قاسيت ياما و اتهنيت
وىّ خيال ما عرفش حدود و انت حياتى و ما اتمنيت
قلبى بحبك عاش مشغول فكرى تمللى معاكى على طول
بَحلَم إنى بإيدى أطول نجمه مفيش لمثيلها وجود
و انا م املكشى غير أحاسيس أكبر من حلمك بكتير
مش بأديَّه
*****
لفيت لدنيا عشان خاطرك و انا صابر على قد غلاوتك
قلت ارجع و انا جاب مهرك و املا الدنيا جمال بحلاوتك
سقتى دلالك ع اللى هواكى و اتمَنَّعتى على اللى رواكى
و حنانى ف حبك خلاكى تفتكرى الدنيادى بأمرك
و انا م املكشى غير أحاسيس أكبر من حلمك بكتير
مش بأديَّه
*****
الدنيا على حلوه و مُرَّه و دوام الحال فيها محال
و الأيام لو ضاقت مَرَّه بكره ح نبقى ف أحسن حال
بس أديكى تكون ف أدَيَّه وىَّ شوية صبر عليَّه
نبنى حياتنا شويَّه شويَّه على قدّ الأحلام و القدره
م انا مقدرش أكون أوناسيس لاجل افرشلك عمرى حرير
أنا م املكشى غير أحاسيس أكبر من حلمك بكتير
مش بأديَّه
===========================================================
(92)
أنا مش لعبه
*************
أنا مش لعبه ف إيد أوهامك أنامش لعبه لكدبه عَلَيَّه
و لانيش رهن ف إيد أيامك و انت بتلعب بيها و بيَّه
أنا مش لعبه
*****
أنا مش لعبه يا أجمل كدبه كنت عايشها بقلبى حقيقه
أنا مش نمره ف عد و حسبه للعشاق يا خيانه جريئه
كنت لوحدك بس ف بالى نبضة قلبى و سحر خيالى
روحى و عمرى و كل آمالى و هويتك دنيتى و الصحبه
و انا مش لعبه
*****
لما بتوعد كنت بتخلف كل معاد و تيبنى ف نارى
و اما اقابلك كنت بتحلف إنى بأعذارك مش دارى
و انت لغيرى وهبت معادى و اديت غيرى اللهفه قصادى
و خيانتك شىء فوق العادى فوق الوصف و مين راح يوصف
و انا مش لعبه
*****
غبت كتير و رجعت عشانك جيت ولقيت الكل فسيرتك
كله بيحكى بإن نشانك جه مظبوط ف عنيه و خسرتك
بس كسبت كيانى و ذاتى راحة ليلى و زمنى الآتى
قبل ضياعى ف وهم حياتى قبل ضياعى ف نارنسيانك
م انا مش لعبه
*****
أنا مش لعبه ف إيد أوهامك أنامش لعبه لكدبه عَلَيَّه
و لانيش رهن ف إيد أيامك و انت بتلعب بيها و بيَّه
أنا مش لعبه
=====================================================

************
ف عز نبضك خيانه و قتل معنى الأمانه
بكلمك عن شعورى و إيدى فيها زهورى
لكن بطعنه جبانه طفيتى نارى و نورى
ف عز نبضك خيانه
********
نسيتى حبى و حنانى و إن عمرك زمانى
و إن كل الحقيقه ف قلبى دنيا بريئه
سهرت فيها الليالى ما غيبتى فيها دقيقه
ف عز نبضك خيانه
********
غزلت حبك ضميرى سلمت قلبك مصيرى
آمنت ليكى و آمنتى لكن لوهمك ، و خنتى
و اديتى قلبك لغيرى و هان هوانا و هنتى
و اكلمك عن شعورى و إيدى فيها زهورى
لكن بطعنه جبانه طفيتى ارى و نورى
ف عز نبضك خيانه
=======================================

» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) ..الأبيات الأولى
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) الأبيات الأولى
» " عتاب " .. للشاعر / علاء الدين سعيد
» قصيدة " أم كلثوم " - للشاعر/ علاء الدين سعيد
» قصيدة " سهرة " .. للشاعر/ علاء الدين سعيد