أغنيات ضمن أوبريت صندوق الدنيا للشاعر علاء الدين سعيد

أغنيات ضمن أوبريت صندوق الدنيا
للشاعر
علاء الدين سعيد
============================

فى ذكرى ثورة 23 يوليو سنة 1952
==============

النهارده عيد كبير من أجمل الأعياد عيد لأكبر ثوره حققت أمجاد
عيد ياربى تديمه وتزيد فِ خيراته جمَّع قلوب العرب والأخ لخواته
عاشت شعوبنا الحره فْ أرضها اسياد
**********
شوف كام سنه مرِّت كأنها مِيَّات
جابت معاها حقوق تتعد بالألوفات
ماقدرش على عدَّها ولا حصر مزاياها
ف الجيش و ف الغيط وحتى ف الشركات
**********
عمال فلاحين جنود بانت بطولاتهم بالفاس و ع السندال وبالروح لخواتهم
أخدنا العهد و مشينا ورا قائد نحمى جميع العرب ونقوم لنجدتهم
وتعيش شعوبنا الحره ف أرضها أسياد
**********
ثورتنا غايه علينا ثورتنا هىَّ الأم
رسمت طريق تحريرإخوه ف الوطن والدم
شوفنا الزعيم البطل عبد السلام عارف
قام بعدها حرر عراقنا الحبيب وانضم
**********
شمس الكفاح طلعت بعدها فِ جزاير لقينا شعب انطلق ورا بطل ثاير
بن بيلا قام نفخ فِ البوق و جمَّعهم حرر بلاده الغاليه وجه بعدها زاير
عاشت شعوبنا الحره ف أرضها أسياد
**********
شوفنا الكويت الحبيبه قامت كمان نهضت
بان الصباح بآل الصباح و انتصرت
وليبيا قامت تطهَّر أرضها رخره
وشويه شوفنا القواعد كلها اندحرت
**********
أما العجيب اللى ما كان على بال لمَّا انطرد حميد الدين وانشال
من بعد ثوره قام شعب اليمن بيها ورا زعيمه البطل ف الوقت دا السلال
و تعيش شعوبنا الحره ف أرضها أسياد
***********
تحيه ومرحبا باخواتنا أهل اليمن
تحيه من قلبنا تحيا بطول الزمن
تحيه للعرب كلهم للدم اللى انهدر
فى صنعا فى لبنان فى سوريا وف عدن
**********
تحيه للزعما عبود وعارف وشهاب وسلال وبن بيلا والقذافى وبورقيبه وزعيمنا جمال
لشعب سوريا البطل للحسن لسعود لحسين تحيه تجمع قلوبنا مدى الجيال
وتعيش شعوبنا الحره ف أرضها أسياد
===========================================
ملحوظه : العمل مسودة لتنشد فى اوبريت " صندوق الدنيا " بنظام الموال
---------------------------------------------------------------------------------------

شعب و جيش
========
كل شعوب العالم شهدوا بنهضه كبيره ماهيش ع البال
لما جموع الشعب اتحدوا و حاربوا الظلم و لاستغلال
جوه الغيط وف قلب المصنع تلقى جهاد مش ممكن يطلع
غير من شعب من الأبطال
*****
شعب و عايش بالحريه هازم كل عنيد جبار
عاش بمبادىء كانت هيه وحدة شعب من الأحرار
قام لبلاده بهمته ثاير شاف للنهضه الكبرى بشاير
جوه الغيط وف قلب المصنع تلقى جهاد مش ممكن يطلع
غير من شعب من الأبطال
*****
قدام وحدة شعبى اتحطم كل نفوذ الإستغلال
صبح الشعب بنفسه بيحكم فين مصلحته مدى الأجيال
قام بشعوره و حسه الوطنى و اتقوينا و زاد خير وطنى
جوه الغيط وف قلب المصنع تلقى جهاد مش ممكن يطلع
غير من شعب من الأبطال
*****
حق كبير له شعبه و أهله ف تقدمنا اللى صنعناه
و آدى مصانع اهِه بتندهله و آدى عزم رجال بانيناه
و آدى تصدير من إنتاج أمه و آدى تطوير و صعود للقمه
جوه الغيط وف قلب المصنع تلقى جهاد مش ممكن يطلع
غير من شعب من الأبطال

==============================================

أنا يا بلادى واهبلك عمرى ندر عليَّه و ح اوفى بندرى
دا الأرواح و العمر هديَّه علشان نبنى النهضه الغاليه
نهضه بتكبر الله أكبر
دقت ساعة العمل الثورى
***
قام ريسنا الغالى جمال قام أعلنها كفاح و نضال
يومها ف خطبة عيد تحريرنا قام بعزيمه و همه و قال
قال ف شهور و ايام راح ننهض قال ح نعوض مجد سنين
و اللى يخون أوطانَّا ح يبعد مش ح نخلى الرجعيين
قلنا حياتنا ملك بلادنا
قلنا وراك يا جمال ملايين
دا الأرواح و العمر هديَّه علشان نبنى النهضه الغاليه
نهضه بتكبر الله أكبر
دقت ساعة العمل الثورى
***
يالله يا عربى ف كل مكان إبنى و على ف البنيان
سيب مستقبل لابنك و ابنى وصيه يبقى يعلى كمان
وصيه يرفع إسم بلاده خليه يحمى الوطن الغالى
قولُّه يوصى كمان أولاده عايزين يفضل إسمنا عالى
قولُّه يا إبنى كافح و ابنى
خلى المجد يدوم طوالى
دا الأرواح و العمر هديَّه علشان نبنى النهضه الغاليه
نهضه بتكبر الله أكبر
دقت ساعة العمل الثورى
***
مابقاش ظالم ولا مظلوم ولا عاد بينّا فقير محروم
ولا بقى عامل ولا فلاح ح يقول يوم حقنا مهضوم
شفنا العهد الحر العادل شفنا مكاسب مش ع البال
الأرباح عايده على العامل و الفلاح خد أرض و مال
حقنا جالنا دا رزق عيالنا
يحيا العدل مدى الأجيال
دا الأرواح و العمر هديَّه علشان نبنى النهضه الغاليه
نهضه بتكبر الله أكبر
دقت ساعة العمل الثورى

==============================================

يا اسطى عطيه
===
يا سطى عطيه نادى زمايلك عيد الثوره بالنور جايلك
ياللا نغنى ياللا نهنى
ياللا يا صاحبى نادى زمايلك
****
ياللا نغنى ف قلب العنبر ياللا نقول على صوت ماكيناتنا
ألف نهار مبروك و منور أهلاً أهلاً عيد ثورتنا
ياللى الخير زاد قوى وياكى يالى الفرحه معادها معاكى
أنا من قلبى راح ادعى و اكبر و انت يا صاحبى نادى زمايلك
****
قرب ياسطى بإيدك حبه نبنى بلدنا الغاليه بإيدنا
أصل الثوره أساسها محبه و كفاح يرفع إسم بلادنا
حيى الثوره يا عامل ياللا و اعرق وارضى كمان المولى
لازم نبقى خوات و أحبه ياللا يا صاحبى نادى زمايلك

===============================================

الف شكر يا جمال
=======
مش ح ننسى بأى حال حق جالنا و كان محال
مستحيل كنا نشوفه مستحيل ولا ف الخيال
مين يصدق كان يجينا يوم ويبقى الخير دا لينا
ألف شكر يا جمال
*****
مش ح ننسى لما كنا محكومين بحديد و نار
قام جمال بالثوره قلنا دى بداية لانتصار
طلّضع اللى خانَّا بره رجع الأوطان دى حره
و التقينا الخير بيكتر عن زمان زاد ألف مره
مين يصدق كان يجينا يوم ويبقى الخير دا لينا
ألف شكر يا جمال
*****
مين يا عالم كان يصدق إن فلاح كان مؤاجر
طول حياته لغيره يعرق يبقى صاحب أرض راخر
أرضه جاتله بعد صبره و اللى يصبر يلقى أجره
و لكده ضحى بحياته لاجل أرضه يفنى عمره
مين يصدق كان يجينا يوم ويبقى الخير دا لينا
ألف شكر يا جمال
*****
و الاَّ مين ينسى كمان لما كان الظلم حالل
كل رجعى كان زمان كان يهينه وصف " عامل "
النهارده الشعب كله إسمه عامل مهما كان له
من رئيس الجمهوريه للى شايل فاس ف شغله
مين يصدق كان يجينا يوم ويبقى الخير دا لينا
ألف شكر يا جمال
*****
المدارس و المعاهد قبل ثورتنا الفتِيَّه
كانوا وقف لكل واحد اصله م الطبقه الغنيه
لما جينا ف عهد عادل عهد يكره حد جاهل
أعلنوها مجّانيه للجميع كل المراحل
مين يصدق كان يجينا يوم ويبقى الخير دا لينا
ألف شكر يا جمال
*****
باشتراكيه و عداله إبتدى حكم البلاد
و اتحادنا كان دلاله إن مجد بلادنا عاد
أوفيا إحنا لزعيمنا اللى ف همومنا قاسمنا
ياللى حبك حته مِنَّا ياللى شفنا فيك مقامنا
مين يصدق كان يجينا يوم ويبقى الخير دا لينا
ألف شكر يا جمال

================================================

ثوره حره ثوره ابيه ثوره كبرى برجال عفيه
ثوره ما تعرف يوم أجازات ثوره تزود لانتصارات
أعلنَّاها ع الرجعيه
*******
إحنا خلاص اختارنا الثوره تبقى طريقنا العمر بحاله
ثوره بتحمى بلادنا الحره ثوره تجيب للشعب آماله
ثوره بنت ف كيان أمتنا ثوره بتفنى عدو بلادنا
ثوره ما تعرف يوم أجازات ثوره تزود لانتصارات
أعلنَّاها ع الرجعيه
*******
ثورة عامل مع فلاح وىّ الطالب و الفنان
ثوره و هيه ف إيدنا سلاح تمحى الخونه ف كل مكان
ثوره و رسمت مستقبلنا ثوره و حسمت سير أجيالنا
ثوره ما تعرف يوم أجازات ثوره تزود لانتصارات
أعلنَّاها ع الرجعيه
*******
ثوره ف كل مكان عاوزينها ثورة مجد و عزه و قوه
ع الرجعيه و على أعوانها ثورة شعب خلاص اتقوّى
ثوره ترجذع مجد زمان تنتج تصنع للأوطان
ثوره ما تعرف يوم أجازات ثوره تزود لانتصارات
أعلنَّاها ع الرجعيه

===============================================

فى الوحدة
==

إفرح يا خىّ و جول معنا اليوم الوحده بتجمعنا
بنفرّح فى عيدها و نحكى و ح
نسهر للفجر ف مغنى
هاليوم الوحده بتجمعنا
***
إفرح يا خيى فى لبنان و البصره و أرض السعوديه
وف صنعا و عدن وف عمّان و القدس الحره العربيه
دا الكل بيتمايل فرحان و ح يسهر للفجر ف مغنى
هاليوم الوحده بتجمعنا
***
صفج يا خى معنا و غنى دا العيد اليوم عيد الوحده
و انا نادر هاليوم نغنى هالغنوه و أكيد الإعدا
و راح ارجص و أبين فنى و ح نسهر للفجر ف مغنى
هاليوم الوحده بتجمعنا

===============================================

=======
النصر قرب و القلوب مستبشره و الشعب صمم ع الكفاح مهما جرى
و تراب بلدنا اللى ارتوى من دمنا يشهد لنا إزاى بناخد حقنا
داحنا العرب منا الهلالى و عنتره
****
النصر باين ف العيون السهرانين عمال بلدنا و الجنود و الفلاحين
ح يكون بإذن الله أكيد من غير جدال حق و اكيد حسينه كل المؤمنين
طول م الأيادى ف الأيادى مشبّكه طول م احنا واهبين عمرنا للمعركه
و تراب بلدنا اللى ارتوى من دمنا يشهد لنا إزاى بناخد حقنا
داحنا العرب منا الهلالى و عنتره
****
إقروا التاريخ شوفوا الشهامه و أصلها شوفوا الرجوله و البطوله و أهلها
طول عمرنا فرسان و هازمين العدا م احنا الإيمان و احنا الحضاره كلها
يا معتدين ياما غيركو حاولوا من زمن و بعزمنا وف أرضنا جه و اندفن
و تراب بلدنا اللى ارتوى من دمنا يشهد لنا إزاى بناخد حقنا
داحنا العرب منا الهلالى و عنتره

=============================================

صواريخ
=
سجل يا تاريخ عهد الصواريخ أهو جانا خلاص زى أمريكا
لا دفعنا فلوس ولا جبنا الروس بأدينا عملنا الفابريكه
***
مهندس جانا من موسكو ولا حتى واشنطن جاب حاجه
أيادينا الحلوه بيتباركوا و عقولنا كمان مش محتاجه
بنفكّر عال نعمل أعمال نغلب بها روسيا و أمريكا
لا دفعنا فلوس ولا جبنا الروس بأدينا عملنا الفابريكه

****
صواريخ عربيه عملناها مش واحد والاّ يا دوب اتنين
دى مصانع بيها بنتباهى أيادينا بتنتجها ملايين
مطرح ما نحب فى سلم ف حرب لازم ح نفوق يوم أمريكا
لا دفعنا فلوس ولا جبنا الروس بأدينا عملنا الفابريكه
****
و بلدنا الغاليه قوى فلسطين ح نجيبها ضرورى لأهاليها
بصاروخ م العربى والاّ اتنين حتمًا ح نطهّر أراضيها
و يموت صهيون يا يعيش مجنون خليه تنفعه بقى أمريكا
لا دفعنا فلوس ولا جبنا الروس بأدينا عملنا الفابريكه
صواريخ صواريخ صواريخ

=============================================
يعاد تنميق و اعادة النظر فيها مع تعديلات واختيارها كمال او حواريه
سلام
===
سلام عليكى يا مصر يا محطمه الأوهام
سلام عليك يا شعب يا محقق الأحلام
سلام عليك ي ابن بلدى ياللى ف البطوله إمام
سلام عليكى يا مصر يا قاهره الأيام
سلامى ليكى يا مصر .. للنيل ولللأهرام
سلام عليكى يا بلدى يا نور لكل ظلام
سلام
=
سلام كلمه قلناها و عنها مارجعنا
سلام كلمه قلناها و دقنا الحرب و شبعنا
سلام كلمه جميله و لفعلها اجمل معنى
سلام كلمه قلناها و ع الحروب مليون لعنه
سلام يا حقى ف التوراه وف الإنجيل و قرآنّا
سلام يا كلمه و بيها حقوقنا ترجعنا
سلام
=
سلام يا غنوه ف قلب اخويا الأصغر
سلام يا حضاره بيها الدنيا تتعمر
سلام يا اروع نور ع الدنيا بينور
سلام يا لون لكل زرعنا الأخضر
سلام وبيك الوجود الدنيا تتحضّر
سلام على الأرض .. و ع الدمار الله أكبر
سلام

===============================================

=======

أحبك يا بلدى يا أحلى عندى م الدنيا ديّه
أحبك يا بلدى يا أغلى عندى من نور عنيَه
*
أحبك يا مصر ف كل حمامه طايره بالغصن الجميل
أحبك يا مصر ف كل غنوه و موال بيقولك يا ليل
أحبك يا مصر ف كل نقطة ميَّه ف حضن نهر النيل
دا كفايه نيلك يا بلدى دوا لكل عليل
*
أحبك يا بلدى ف كل فتلة خيط عملتها إديَّه
أحبك يا بلدى ف كل نقطة دم كانت دين عليَّه
*
أحبك يا مصر ف كل فلاح إبن بلد و أصيل
أحبك يا مصر ف كل مداح بيغنى يا عين يا ليل
أحبك يا مصر ف كل طلعة شمس بعد ظلم طويل
دا كفايه شمسك يا بلدى دوا لكل عليل
*
أحبك يا مصر ف كل نصر اتحقق كان لنا أمنيَّه
أحبك يا مصر ف كل ثوره كانت ع التصحيح قويَّه
*
أحبك يا مصر ف كل عين سهرانه وىّ طول الليل
أحبك يا مصر ف كل كتاب مفتوح للعلم الجليل
أحبك يا مصر ف كل علم يشق للحضاره سبيل
و انا حبى ليكى يا بلدى مالهش عندى بديل
*
أحبك يا بلدى ياللى بالأحباب غنيّه
أحبك يا مصر و إسمك ف الفؤاد أغنيَّه

=============================================

عُمَّال بتنتج للبلد خيرات
أبطال بتصنع بالكفاح بطولات
ف كل موقع معجزه تلاقيها
حكايات كتيره نفتخر بيها
...............................

=================================================

عمار يا مصر طول م الولاد شاطره
عمار يا مصر طول م العقول فاكره
طول م الحياه إنتاج ، تروس دايره
طول م الغيطان سجاد ع الأرض بينور
ي ام الشعور الدهب و الخضره يا سمره

============================================

أمه واحده
=

» الأوبريت الغنائى صندوق الدنيا .. تأليف الشاعر / علاء الدين سعيد
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) ..الأبيات الأولى
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) الأبيات الأولى
» " عتاب " .. للشاعر / علاء الدين سعيد
» قصيدة " أم كلثوم " - للشاعر/ علاء الدين سعيد