الأوبريت الغنائى صندوق الدنيا .. تأليف الشاعر / علاء الدين سعيد

الأوبريت الغنائى

صندوق الدنيا

مصر منذ ما قبل الثورة حتى الآن

تأليف الشاعر

علاء الدين سعيد

*********************
المنظر
أحد الأحياء الشعبية فى مكان ما بمصر - صندوق الدنيا الشهير فى هذه الأحياء
و صاحبه يحاول إجتذاب الجمهور إليه بالنفخ فى نفيره و غنائه و حوله الأطفال يلهون ويلعبون و عدد من أهل الحى و المارة

---
ياللى تحب تشوف نهضتنا ياللى بقيت اليوم حاجه تانيه
قرب شوف أمجاد ثورتنا ح نشوفها ف صندوق الدنيا
*****
قرب يابنى بسرعه شويه قبل م ادَوَّر ياللا امّال
ح نوريك عهد المَلَكِيَّه و اشتراكيّة عهد جمال
ياللا امَّال ح تشوف مِيْت صوره
عن أمجادنا
بص قوام جوه البَنُّورَه
تلقى بلادنا
تلقى الخير جايباه الثوره تلقى النور بقى مالى الدنيا
ياللا قوام صندوق الدنيا
*****

(ينفخ فى نفيره استعدادًا لبدء العرض وهويشرح محتوى الصورة غنائيًا )

قدامك صوره من الريف من أيام حكم المَلَكيَّه
كانوا فاكرين فلاحنا ضعيف حرموه حتى من الحريه
كان عايش دايما ف آلام مستحمل ذل الأيام
كان يعرق و الخير ياخدوه كان يشقى و ياريت يدُّوه
و يغنى و يقول ف كلام ....

(موسيقى إنتقالية تنقلنا إلى أحد الحقول فى ريف ما قبل الثورة - أحد الفلاحين يغنى معبرًا عن حالة الفلاحين و آلامهم و آمالهم ) .......

الصبر صبرنا كتير منه و ح نصبر تانى و نستنى
و أملنا كبير ف الله إنه مايسيبش الظَلَمَه تبهدلنا
دا المولى بيستنى و يمهل و لا يرضى يسَيِّب و لا يهمل
و مسيره بعدله يخلصنا
*****

بجى ده يرضيك برضه يا ربى أرضك ياخدوها الغشاشه
من شرجى بلدنا و من غربى كل دا يمتلكه واحد باشا
و بلدنا و أهلها شغاله ف نهار وف ليل وف جيَّاله
و الخير بيروح لأفندينا و لا عمره يفكر يدينا
إبعت من عندك خلصنا

(تعود بنا الموسيقى مرة أخرى إلى صاحب صندوق الدنيا الذى يواصل عرض صوره ، شارحًا صورة جديدة )

و آدى العامل شوفه كمان شوف كان حاله ازَّاى مسكين
كان عمره مقضيه حرمان و بعرقه بيجيب ملايين
كان عايش دايمًا ف آلام مستحمل ذل الأيام
كان يعرق و الخير ياخدوه كان يشقى و يا ريت يدُّوه
و يغنى و يقول ف كلام ....

(موسيقى انتقالية مرة أخرى لنعيش مع العامل قبل قيام الثورة الذى يغنى معبرا عما يعانيه فى تلك المرحلة - احد العمال يغنى )

زى المكن ع المكن أسهر و اجيب إنتاج
و اقبض يا عينى التَمَن ملاليم و انا ......
أما بقى البهوات يستولوا ع الجنيهات
بالزوفه .. بالألوفات و افضل أنا المحتاج
*****
لو عاز ف يوم المكن مسمار ، قوام يجيبوه
و ان عزت مره الدوا ، أسمَع كلام يقولوه
يقولوا : لو صحتك تعبانه روح ماتجيش
و مهما كات خدمتك ح نقول مكافأه مفيش
و عندك المحكمه .. روح اشتكينا هناك
ماتطولش شىء مننا لو حتى شفت قفاك
و اصبر عشان محتاج

(نعود الى الموسيقى مع صاحب الصندوق ليقدم لنا صورة جديدة - يغنى )

لما زاد الظلم ع الشعب الهمام لما طال الليل و طال عهد الظلام
قام زعيم م الشعب قاد النور و نادَى شعبنا قوم خد مكانك ف القياده

دغرى قام الشعب يهتف
للأَمام للأمَام للأَمام

( أصوات جماهير الشعب تهتف مؤيدة للثورة و زعيمها مرددة هتافها عدة مرات )

عاش جمال .. عاش جمال كل الشعب معاك يا جمال

(ينطلق صوت من بين الجماهير مغنيا )

قام ريسنا الغالى جمال قام أعلنها كفاح و نضال
قام و الجيش و الشعب معاه نادى بعزم و همه و قال
قال ف شهور و ايَّام راح ننهض قال ح نعَوَّض مجد سنين
و اللى يخون أوطانَّا ح يبعد مش ح نخلى الرجعيين
قلنا حياتنا ملك بلادنا
و احنا وراك يا جمال ملايين

(عودة إلى الفلاح الذى رأيناه فى صندوق الدنيا يتحدث قبل الثورة - يغنى )

دلوجتى الفلاح مبسوط دلوجتى صاحب أملاك
و بيسكن أحسنها بيوت الثوره بانياها هناك
بجى عايش دلوجتى كويس و زمايله كمان جوه المجلس
وف أرضه بيزرع و بيجلع و الكل بيهتف للريس

( أصوات فلاحين تهتف و تغنى للثورة و زعيمها و هم فى الطريق إلى حقولهم - غناء )

يا زعيم ثورتنا يا جمال
يا حبيب أمتنا يا جمال
يا مرجع للشعب كرامته يا مخلى الفلاح له جيمته
يحميك المولى يا جمال
*****
دلوجتى بنعرج و بنشجى و الخير ف الآخر جايِّلنا
وان عزنا مْساعده جوام نلجى جمعيه تجيب و بتديلنا
و الأرض الرمله بتتصلح بُكرَه ح تِخضَرّ و تتفلَّح
و ح نعرج أكتر يا جمال
و الخير راح يكتر يا جمال

يا مرجع للشعب كرامته يا مخلى الفلاح له جيمته
يحميك المولى يا جمال

( عودة إلى صاحب صندوق الدنيا ليقدم لنا الصورة الجديدة للعامل بعد الثورة غناءًا - يغنى )

و آدى العامل ياللا نشوفه ياللا نفوت بالمره عليه
ياللا نشوف دلوقت ظروفه بعد لثوره بيعمل إيه
بعد المصنع ما صبح ملكه بعد الناس ما راحوله و باركو
بعد ما خد أرباح و زمايله بقوا ف الحكم كمان بيشاركو

(موسيقى النتقالية الى العامل بعد الثورة ليقدم العامل - يغنى العامل عن حاله بعد الثورة - يغنى)

» أغنيات ضمن أوبريت صندوق الدنيا للشاعر علاء الدين سعيد
» قبل المغرب سهرة رمضانيَّة إذاعِيَّّة تأليف علاء الدين سعيد
» " من أنت ِ ؟! " .. قصيدة الشاعر / علاء الدين سعيد
» الإسكندرية .. قصيدة الشاعر/ علاء الدين سعيد‏
» " أوَيَدرى ؟! ".. قصيدة الشاعر/ علاء الدين سعيد