قبل المغرب سهرة رمضانيَّة إذاعِيَّّة تأليف علاء الدين سعيد

قبل المغرب

سهرة رمضانيَّة إذاعِيَّّة

تأليف

علاء الدين سعيد

=============================

قبل المغرب

سهرة رمضانيَّة إذاعِيَّّة

تأليف

علاء الدين سعيد

=============================
فى إحدى قرى الريف .. و فى أحد أيَّام شهر رمضان المبارك ؟ظ و الوقت قبل أذان
المغرب بنحو ساعة .. و الساقية تدور شادية بأنغامها الهادئة يصحبها صوت خرير
المياه المتدفقة منها ، فيكوّنان معا لحنًا رقيقًا عذبًا حالمًا .. بينما يعمل " سرحان " فى
رىّ حقله و ما يلبث بين الحين و الآخر أن يصيح مرددًا نداءه التقليدى .....

سرحان : عاه .. عاه اَّال
سليم : ( من بعيد ) يا سرحان .. يا سرحان
سرحان : (بصوت عالٍ ) ايوه .. تعالى يا سليم .. عاوز حاجه ؟
سليم : ( صوته يقترب ) ما تحِلّ الساجيه بَجَى و ياللا بينا نرَوَّح .. المغرب يا دوبك فاضل
عليه ساعه
سرحان : ايوه خلاص اهه .. فاضل جدَّامى حاجه بسيطه
سليم : فاضل ايه لِسِّه ؟
سرحان : مافضلش غير جيراطين الغلّه اللى حدا الساجيه دول
سليم : إهّيه .. ماتخلّيهم لِبُكره .. إنت عاوز المغرب يدَّن علينا و احنا لسَّانا فى الغيط ؟ ..
ياللا يا شيخ امَّال ..ياللا بينا خلّينا نفطر ف بيوتنا زىّ بَجية عباد الله .. و بُكره
ابجَى تعالى اسَّلَّى فيهم شويّه
سرحان : بُكره ؟ .. إنت ما عِلمَكش ؟
سليم : ما علميش بإيه ؟ .. خير انشالله
سرحان : أصلى بُكرَه مسافر لحدّ اسكندريه عشان ازور فؤاد ابن خالتى
سليم : إهّيه ؟ .. بُكرَه بُكره ؟
سرحان : ايوه بكره بكره ان شاء الله .. امَّال بُكرَه امبارح ؟ .. عشان كده عاوز اروى الحته
اللى فاضله دى لاجل النفر يبجى مسافر و هوَّه مِطّمّن
سليم : و مسافر أيَّتها ساعه إن شاء الله ؟
سرحان : و الله عاوز اركب جطر الساعه عَشرَه .. حاكم جطر عشره يوصَّلنى هناك يا دوبك
ع الفطار عِدِل
سليم : حيث كده .. خف إيدك بجى وآنى معاك أهُه لاجل نِلْحَج نِرَوَّح جبل المغربيِّه .. عاه
.. دورى يا ساجيه .. عاه .. عاه امَّال ....

( على أنغام الساقية تعزف موسيقى تمهيدًا لأغنية يغنيها سالم )

دورى يا ساجيه بهمه شويه جبل أدان المغرب ياللا
ياللا امال و هاتيلنا الميه و احنا معاكى ح نروى الغله
دورى يا ساجيه
*****
دورى يا ساجيه و سلى صيامنا ياللى النغم الحلو كلامك
جولى معانا و غنى كلامنا و ابعتى خيرنا مع أنغامك
عاوزين نروى الأرض يا ساجيه جبل المغرب همى يا ساجيه
ياللا امال و هاتيلنا الميه و احنا معاكى ح نروى الغله
دورى يا ساجيه
*****
دورى يا ساجيه دول جيراطين جبل المغرب راح نرويهم
و آدى سرحان بأديه لاتنين و آنى وياه جايين نسجيهم
فاضل حاجه بسيطه يا ساجيه ياللا بهمه شويه يا ساجيه
ياللا امال و هاتيلنا الميه و احنا معاكى ح نروى الغله
دورى يا ساجيه

(موسيقى إنتقالية إلى داخل القطار قبل وصوله إلى الإسكندرية - أصوات الباعة
الجائلين بالقطار مختلطة مع أصوات الركاب )

بائع : (صوته من بعيد ثم يقترب ثم يبتعد ثانيًا ) اللى عاوز قلم رصاص قلم جاف قلم كوبيا
.. مكن حلاقه مواس حلاقه فرشة حلاقه .. معايا نوته تكتب فيها الديون اللى عليك و
قلم كوبيا .. كوبيا يا كوبيا ...
بائع 2 : معايا الروايح و العتور .. حد عاوز عتر؟ .. اللى عاوز يتعتر و يتبخر .. معايا
البخور و الجاوى .. البخور الهندى .. معايا الروايح و العتور .. العتر ...
سرحان : ألاّ جوللى يا بتاع الريحه
بائع 2 : أيوَه يا عمده .. معايا روايح تعجبك .. خد دى .. هديه
سرحان : إيه دى ؟
بائع 2 : دى خلاسه .. شم ( ويبدو للسامع انه يقربها بشدة من انف حسان )
سرحان : يا عم انت ابعد الجزازه دى عنى كده .. إنت عاوز تفطرنى ؟!
بائع 2 : لا يا حاج دى مقفوله ماتخافش
سرحان : إلاَّ جوللى .. هيه اسكندريه فاضل عليها كتير ؟
بائع 2 : لا أبدًا خلاس وسلنا .. هيه يا دوبك المحته اللى جايه دى .. إيه ؟ .. إنت
و لا مؤاخذه مش عاوز عتر و الاّ إيه ؟
سرحان : لا يا عم كتر خيرك .. دانى عاوز أسألك بس عن اسكندريه
بائع 2 : تب و ليه كده بأآآآه ؟
سرحان : هو إيه اللى ليه كده ؟ ! .. بلاش اسألك يعنى و الليه ؟
بائع 2 : عتلتنى .. هوه انا ناقص عتله يا عمنا ؟
راكب : معلش .. الأرزاق على الله و ربنا ح يكرمك برضه
بائع 2 : ( يقف متعجبًا و يضرب كفًا بكف ) أما عجايب .. العتر .. حد عاوز يتنيل يتعتر ؟
.. معايا العتر .. اللى عاوز البخور الهندى .. أوكازيون يا خوانّا .. تب ببلاش ..
أعوذ بالله .. تب حد عاوز فلوس و لا مؤاخذه ؟ .. دا إيه اليوم اللى ما يعلم بيه إلا
ربنا ده ؟
( أثناء حديثه يبدو صوت البائع الأول من بعيد ثم يقترب عند انتهاء الجملة السابقة
و ينادى و كأنه يكمل حديث البائع 2 مباشرة )
بائع 1 : كوبيا كوبيا .. معايا الكوبيا و الرصاص و الجاف .. معايا النوته اللى تكتب فيها
الديون اللى عليك .. (يبتعد الصوت تدريجيًا ) .. مكن حلاقه مواس حلاقه فرشة
حلاقه .. الكوبيا يا كوبيا ...
سرحان : ( للبائع 2 ) و الاَّ اجولَّك .. خد يا عم .. هاتلى عودين بخور م الهندى ده .. هه ياللا
عشان خاطر رمضان
البائع 2 : ماشى يا عمده .. ربنا يديم علينا رمضان و ايامه الحلوه
سرحان : أجولك .. خليهم تلات عيدان
البائع 2 : على عينى .. إتفدَّل يا سيدى
سرحان : إيوه .. إيوايوه
البائع 2 : أى خدمه .. آدى الباقى يا سيدى مزبوت ؟ ( صوت صفير القطار )
سرحان : يزيد فضلك ( صوت صفير القطار )
البائع 2 : ياللا بقى يا عمده .. جهز نفسك و لا مؤاخذه عشان القتر داخل المحته خلاس
سرحان : كده ؟ .. طب يا سيدى كتر خيرك
البائع 2 : العفو يا حاج .. ( الصوت يبتعد تدريجيا ) .. معايا العتر .. اللى عاوز البخور
الهندى قبل ما ننزل .. اللى عاوز يتعتر ...

( صوت وقوف القطار بالمحطة - اصوات المستقبلين مختلطة مع أصوات
المسافرين و الحمالين )
مستقبل : يا سالم .. سالم
مستقبله : أهِى .. إنزلى يا ليلى
شيَّال : شيال شيال .. شيال .. شيال يا فندى ؟
الأفندى : ( بعجرفة ) شيال فى عينك قليل الحيا .. أنا منظرى شيال يا عديم النظر ؟!
الشيال : أنا باسألك يا فندى عاوز شيال ؟
مستقبل : حسن افندى .. يا حسن افندى
مسافر : أيوَه تعالى يا جلال .. قابل سهير من ع الباب
الشيال : شيال شيال
مسافره : مدحت .. خد يا مدحت
مستقبل : على مهلك يا هناء .. إنزل انت بقى يا سعيد
الشيال : شيال .. شيال يا هانم ؟
سرحان : يا شيال .. يا شيال
الشيال : أيوَه يا حاج
سرحان : خد اتناول منى الحاجات دى
الشيال : ناولنى ناول
سرحان : خد .. إمسك الجفه دى
الشيال : هات .. هيلا هوب
سرحان : و السلالى ده
الشيال : هات .. سيب انت بقى و انزل
سرحان : حاسب عليهم امال .. على مهلك كده
الشيال : يا سيدى ماتخافش .. معاك حاجه تانيه ؟
سرحان : لا مفيش غير الجفص ده آنى ح اشيله
الشيال : طب ياللا بينا بقى نطلعو بره المحطه
سرحان : ايوه ياللا بينا جوام لاجل اوصل جبل المغرب
الشيال : ياه .. دا لسه بدرى ع المدفع .. دا فاضل ييجى ساعه و شويه .. ما قلتليش ألاَّ انت
رايح بعيد ؟
سرحان : بجى آنى يا سيدى .. رايح لفؤاد ابن خالتى .. حكم هوه مستوظف هنا فى اسكندريه
و العلوان بتاعه اهه .. فى الورجه اهو مكتوب
الشيال : إيه ده ؟ .. يعنى انت مش عارف البيت ؟
سرحان : لآء معرفوش .. بس هو كان جايللى آخدلى ترمبيل من جدام المحطه و اديله العلوان
و هوه بجى ح يوصلنى لحدت باب دار فؤاد ابن خالتى
الشيال : طب إدّى لافندى اللى ع الباب ده التسكره .. وتعالى بقى اركبك تاكسى يوصلك
سرحان : طب بس على مهلك شويه .. أوعى نتوه من بعضينا فى الزحمه دى
الشيال : ماتخافش بس خليك ورايا .. تعالى .. تعالى من هنا ..أيوَه .. خليك ورايا .. تعالى كده
آيوَه .. بس يا عم و آدى التاكسيات أهِه
سرحان : طب بس حاسب ع الجفه وانت بتنزلها .. وخلى بالك وانت بتحط السلالى
الشيال : يا عم ماتخافش .. و النبى لو تسمح ياسطى ( متحدثا إلى سائق تاكسى )
السائق : أيوَه يا ريس
الشيال : و النبى تسند معايا ياسطى ( و ينزل أحماله ) .. و النبى كنا عاوزينك توصل الحاج
على العنوان اللى عاوزه
السائق : يا أهلا و سهلا يتفضل .. على مهلك .. أيوَه .. حط القفه دى هنا .. لأ لأ ورا ..
و السبت هاته هنا و خلى القفص ورا .. آيوه .. بس يا عم كده السطه و عال
الشيال : لا مؤاخذه الحساب يا حاج
سرحان : خد
الشيال : إيه دا يا عم ؟ .. لسه جوز جنيهات
سرحان : ليه ؟ .. كده عال خالص
الشيال : يا عم لسه اتنين جنى كمان
سرحان : إحياة كتاب الله المجيد كده عال العال و حلو خالص
الشيال : أيُّوه يا جدعان على كده
سرحان : جوز جنيهات على إيه ؟ .. لاهو آنى كنت محملك تبن و الاّ كنت شايلنى آنى كمان ؟
السائق : خلصو يا خوانّا خلونا نتوكلو على الله قبل المدفع ما يضرب
الشيال : اللهم إنى صايم
سرحان : إيوه .. اللهم إنك صايم .. خد .. خد الربع جنيه ده باروكيه منى بس لاجل رمضان
كريم بس إى و الله ..كل سنه وانت طيب
الشيال : و انت بالصحه .. أمرنا لله ح نعملو إيه بس ؟ .. ( يبدأ فى ندائه المعتاد و يبتعد
صوته تدريجيًا ) شيال .. شيال شيال .. حد عاوز شيال
السائق : إركب بقى يا بركه خلينا نتوكلو على الله
سرحان : إيوه امال .. يا ساتر .. هه ( وصوت إغلاق باب التاكسى بعنف )
السائق : الله الله بالراحه ع الباب يا بركه .. ( صوت سير السيارة ) .. ما قلتليش ناوى على
فين إن شاء الله ؟
سرحان : إيوَه خد .. خد ياسطى ودينى ع العلوان اللى فى الورجه دى
السائق : ماشى ورينى كده .. دا فى شارع بور سعيد أنا عارفه
سرحان : بس ما جولتليش ح تاخد كام
السائق : اللى تدفعه يا عم بس نوصلو .. و الاَّ تيجى نفطروا سوا الأول و بعدين نوصلوك
سرحان : لأ كتر خيرك .. حكم فؤاد ابن خالتى كان جايللى ادفع الأجره بس بعد ما توصلنى
السائق : ( يضحك ) و ماله ا ركه خليها علينا خالص .. ربنا بس يسهل و نوصلو قبل المدفع
ما يضرب .. المهم عزيزه تبقى معانا فى السليم
سرحان : عزيزه ؟! .. عزيزه مين ؟
السائق : العربيه .. ماهى العربيه دى مسميها عزيزه
سرحان : بحسب عزيزه بنت ابوك الحلج سيماعين .. جلت ايه اللى جابها هنا
السائق : ( ضاحكًا ) لا يا سيدى دى العربيه اصلها غاليه عندى قوى فسميتها عزيزه .. فاتح
منها بيتى بعون الله و بيوت تانيه و حياتك
سرحان : ( مداعبًا و مسايرًا السائق ) طب و الله ياللا يا عزيزه همى شويه .. ياللا امال لحسن
المغرب جرب يدن .. ( يضحكان ) ..ما توصيها علينا امال ياسطى
السائق : ( ضاحكًا ) ماشى كلامك .. إيه يا عزيزه ماتكسيفيناش .. عاوزين نوصلو قبل
المغرب

) موسيقى إنتقالية تنتهى بصوت جرس الباب فى منزل فؤاد )

سرور : ( من الخارج ) ياسى فؤاد .. يا فؤاد افندى
فؤاد : ( من الداخل ) أيوَه يا عم سرور حاضر ..( صوت فتح الباب ) اهلا أهلا
سرور : إيه روايح الأكل الهلوه دى .. كل سنه وانت طيب
فؤاد : و انت بالصحه و السلامه .. إتفضل .. ادخل ( صوت إغلاق الباب ) إتفضل .. اقعد
يا عم سرور
سرور : لا معلش .. اصلى كنت جايب البدله بتاع صاله افندى اللى ساكن جنبك من عند
المكوجى بس مالجيتوش فى الأوضه بتاعه .. جلت اهود أسيبه عندك لغاية ما
ييجى ياخده
فؤاد : طيب علقها هنا يا عم سرور ع الشماعه لحسن إيدى مبلوله و الطبيخ حيتحرق
و المغرب فاضل عليه ساعه ( صوت خطوات فؤاد غلى الداخل )
سرور : هاضر ياسى فؤاد نعلجه لهسن الطبيخ يتهرج
فؤاد : ( صوت من بعيد ) استنى يا عم سرور اقعد .. اصلى كنت بَوَطى البوتجاز ع الرز
سرور : رز ؟ .. أما والله العظيم إلا رز دى .. إيه بس اللى زانجك على كده ؟ .. بجالك
تلات سنين ساكن فى العماره دى و نجولك ياسى فؤاد شوفلك عروسه يريه جلبك
فؤاد : يا ساتر يا رب فال الله ولا فالك يا شيخ .. و مين قالك ان العروسه بتريح القلب ؟
سرور : يا سلام .. دى هيه الراهه بتاع الجلب كله .. تيجى من شغلك تلاجى هاجتك نضيف
مرتب أربعه و عشرين جيراط .. أكلك متوضب هاجه مفيش كده .. لا بصله يخلى
عينك يدمّع و لا طبيخ يتهرج
فؤاد : ( ضاحكا مازحا ) صحيح يا عم سرور الطبيخ مش ح يتحرق .. لكن دمى أنا اللى
ح يتحرق ( يضحكان )
سرور : يا راجل سيبك بجى من الفكره اللى فى دماغك دى .. هضرتك بتبص لصاله افندى
.. صاله افندى راجل هواوى .. لكن هضرتك من عيله كبير فى البلد عندكم ..
و ناس متدينين عارفين ربنا كويس .. و الجواز نص الدين
فؤاد : طب لحظه واحده يا عم سرور .. ( الصوت يبتعد تدريجيا ) ح ابص على الطبيخ
و جايلك حالا .. أوعى تمشى
سرور : هاضر ياسى فؤاد .. ( لنفسه ) يا سلام على الأخلاج .. آدى الناس و الاّ بلاش ..
الله يسترها معاك و يرزجك ببنت الهلال اللى يريه جلبك ياسى فؤاد ى ابن هوا وآدم

سرحان : ( من الخارج ) يا فؤاد .. يا فؤاد .. يا فؤاد يابو محمد يابو حسين يا بو جرون .. يا
فؤاد يابو محمد يابو حسين يابو جرون
سرور : ( لنفسه ) إيه الزيطه و الزومباليطه اللى بره ده ؟ لما نشوف كده ( صوت فتح
الباب بينما لا يزال سرحان يردد النداء - سرور يتحدث الى سرحان ) غيه يا هضرة
تزعج كده ليه انت فين انت ؟ .. عاوز مين انت ؟
سرحان : مش هنا برضه دار فؤاد أبو محمد أبو حسين ابو جرون ؟
سرور : ابو جرون ؟ ( ضاحكا ) اما و الله العظيم
سرحان : إيوَه فؤاد .. فؤاد ابن خالتى
سرور : ايوه الشجه دى بتاع فؤاد افندى .. لكن مش عارف ابو جرون و الا لأ .. إلاَّ أبو
جرون دى كمان ( و يضحك ) .. أما والله العظيم .. إتفضل لما نساله هو و الا لأ ..
( ينادى للداخل بصوت عال ) ياسى فؤاد .. ياسى فؤاد
فؤاد : ( من الداخل بعيدا ) أيوه يا عم سرور
سرور : ألاّ هضرتك أبو جرون صهيه ؟
فؤاد : أبو قرون ؟ ( صوت خطواته قادما و قد فاجأه وجود سرحان ) مين ؟ الشيخ
سرحان ؟ .. مش معقول .. ( صوت عناق و قبلات و ترحيب حار ) إزيك يا شيخ
سرحان .. إيه المفاجأه الحلوه دى ؟ .. يا أهلا و سهلا
سرحان : فؤاد ؟ .. بسم الله ماشاء الله .. بالحضن يا راجل ( يقبله ) إزيك يا فؤاد ؟
فؤاد : الله يسلمك ازيك انت ؟ .. عاش من شافك يا راجل
سرحان : تسلم يا غالى يابن الغاليين .. سلامات كده
فؤاد : الله يحفظك
سرحان : مش حلو كده ؟
فؤاد : الحمد لله اتفضل استريح .. اقعد
سرحان : اجعد ؟ .. أجعد ازاى ؟ .. فؤاد .. بالحضن ( صوت تقبيل سرحان لفؤاد )
فؤاد : طب اقعد بس استريح
سرحان : آنى مستريح كده .. يا سلام ياولاد .. بالحضن يا فؤاد ( يقبل فؤاد و فؤاد يضحك )
فؤاد : الطبيخ ح يتحرق يا شيخ سرحان
سرحان : الطبيخ ؟ لأ الحج شوفه ( صوت خطوات فؤاد الى المطبخ تبتعد بينما يتوجه
سرحان الى سرور و يحدثه ) هى هى .. إلاَّ انت بجى تطلع مين ؟
سرور : أنا سرور البواب
سرحان : سرور ؟ .. إزيك يا سرور بالحضن يا راجل
سرور : ( مقاطعا ) لا لا إعمل معروف .. هد الله بينى و بينك .. انا كويس كده من غير هضن
( مناديا بصوت عال و كانه يحاول الفرار من سرحان ) عن إذنك ياسى فؤاد .. لما
ييجى صاله افندى هابعتهولك ياخد البدله بتاعه
فؤاد : ( الصوت يقترب من بعيد ) إستنى يا عم سرور نفطرو سوا
سرور : كتر خيرك يا سى فؤاد
فؤاد : طيب مش تستنى لما نعرفكم ببعض ؟ .. حضرته بقى الشيخ سرحان .. إبن خالتى
سرور : تشرفنا يافندم
سرحان : و عين اعيان كفر إجرى منوفيه
سرور : كفر إجرى ؟ ( و يكتم الضحكة )
فؤاد : و حضرته يا سيدى عم سرور البواب .و أقدم بواب فى الحى كله
سرحان : إزددنا سرور يا عم سرور
سرور : كتر خيرك سلاموعليكم
سرحان : ( فجأة و بصوت عال ) يا نهار زى وشك يا عم سرور .. يادى الوجعه ياولاد
فؤاد : ( منزعجا ) إيه فيه إيه ؟
سرحان : الزياره .. الزياره اللانى جايبها م البلد
فؤاد و سرور : مالها ؟
سرحان : زمانها انسرجت .. سايبها بسلامتى جدام الباب جلت بدال م اطلع شايلها يمكن
يكون العلوان غلط أجوم ارجع بيها البلد ..آنى رايح اشوفها
سرور : لا خليك إنت و انا رايه نجيبه لغاية هنا لو موجود
فؤاد : طب قوامك بس يا عم سرور الله يخليك
سرور : هاضر ( صوت فتح الباب ثم إغلاقه )
فؤاد : إتفضل انت يا شيخ سرحان استريح .. هيه .. و ازاى حال البلد ؟
سرحان : الحاله عال العال و الحمد لله و الكل بيسأل عنك .. الكل مشتاجينلك جوى و نفسهم
منى عينهم كده يشوفوك
فؤاد : و ابويا و امى واخواتى ازيهم ؟ .. مش كويسين و الحمد لله ؟
سرحان : حلوين جوى .. و ابوك بيسلم عليك و بيجولك إن الوظيفه اللى انت مستوظفها هنا
دى بتغيبك عن البلد كتير .. و انك فين و فين على ما بتروح زياره .. عشان كده
بيجولك بلاها شغلانه و سيبها و تعالى معايا البلد .. و بلاها حكاية الوظايف اللى
مغرباك عن اهلك دى .. و ع العموم هو كاتبلك الجواب ده و جايللك فيه ع اللى
عايزه
فؤاد : ورينى يا سيدى اما اشوف كاتب ايه
( صوت فض الخطاب و تمتمة فؤاد أثناء قراءته - ثم يظهر صوت من الشارع يغنى )

الصوت :
هليت يا شهر الزكا و البركه و الإحسان
يا شهر كلك هنا و الكل بيك فرحان
يا رب بارك لنا و اغفر لنا ذنوبنا
بحق شهرك المفترج .. رمضان

سرحان : ( بإعجاب شديد و وله ) يا سلام .. مين اللى بيغنى ده يا فؤاد ؟
فؤاد : ( و هو مشغول بالخطاب ) هه؟ .. آه .. ده راجل على باب الله قاعد قدام العماره
و الناس بيقولو إنه بقاله أكتر من عشر سنين فى الحته دى
سرحان : إيه ده ؟ .. بجاله المده دى جاعد كده لا شغله ولا مشغله ؟
فؤاد : مالوش شغله إلا إنه يذكر ربنا شويه و يصلى شويه و يغنى شويه .. مسكين اهل
الحته كلهم بيعطفو عليه .. يعنى حسب ما ربنا يقدرهم
سرحان : عجايب .. بس ربك و الحج صوته حلو جوى .. كده والاَّ لآء ؟
فؤاد : هو فعلا صوته حلو .. الغرض
سرحان : إيوه أبوك بيجولك ايه بجى فى الجواب ؟
فؤاد : يا سيدى أبويا ده راجل طيب .. عاوزنى أسيب الوظيفه اللى باكل منها عيش
و اروح اقعد فى البلد عشان المسافه بعيده .. و بيسمينى متغرب .. أمال يعمل ايه
لو الواحد مسافر بره مثلا و الا شغال فى حته مقطوعه ؟
سرحان : آنى عارف بجه ؟ .. ماهوه اللى عايز كده
فؤاد : بجى شوف يا فؤاد يابن خالتى .. بجى النفر لازم يجول الحجيجه و لو على ابن
خالته ايوه امال .. ابوك دلوجتى بجى عضمه كبيره وانت عارف ان عنده اطيان
كتيره محتاجه للمراعيه .. فيها إيه لو تيجى تجعد فى البلد و تراعى الأرض ؟
اجلُّه يعنى تباشر البهايم اللى فى البلد
سرور : ( من الخارج ) ياسى فؤاد
فؤاد : أيوه يا عم سرور حاضر .. ( صوت فتح الباب ) ادخل يا عم سرور
سرور : الهاجه اهو ياسى فؤاد
فؤاد : متشكرين يا عم سرور .. اقعد بقى نفطر سوا
سرور : كتر خيرك ربنا يزيدك من نعيمه .. عن اذنك
سرحان : طب استنى خدلك جوز بتاوى للعيال
سرور : الله يخليك يا شيخ سكران
سرحان : سكران ؟ سرحان يا راجل انت
سرور : عدم المؤاخذه يا شيخ سكر .. يا شيخ سرهان .. سلامو عليكم
سرحان : و عليكم السلام و رحمة الله و بركاته
فؤاد : مع السلامه يا عمى سرور ( صوت غلاق الباب )
سرحان : سرور .. هه .. بجى ده سرور ده ؟ .. ده عكننه .. ده جريفه
فؤاد : جرى ايه يا سرحان انت ناسى انك صايم و ح تنم بقى ؟
سرحان : على رأيك
فؤاد : بدل كده احكيلى على اخبار البلد طمنى .. سلينا على ما المدفع يضرب
سرحان : شوف يا سيدى و ما سيدك الا آنى .. بجى عمك سليمان لاجرع .. تعيش انت
فؤاد : لا اله الا الله و لا حول ولا قوة الا بالله .. بقى الحاج سليمان مات ؟ .. الله يرحمه
و يحسن اليه كان راجل طيب
سرحان : تعرف خالتك مختشيّه ؟
فؤاد : إيوه خالتك مختشيه .. خالتك مختشيه اللى كانت بتعارك طوب الأرض فى البلد ؟
.. إهى حد ما يعرفش خالتك مختشيه ؟ .. اللى كات راعبه حريم دار أبو ساروخ
فؤاد : ( متذكرا ) آآآآآآآآه .. أيوه أيوه مختشيه افتكرتها .. مالها بقى ؟
سرحان : ماتت رخره
فؤاد : لا يا شيخ ماتت ؟ .. نهايته اذكروا محاسن موتاكم الله يرحمها .. قوللى سالم بقى
قد ايه دلوقت ؟
سرحان : بجى جدّيه ؟ .. يعنى اهو كبر عن عامنول
فؤاد : ( ضاحكا ) طب عال كويس
سرحان : فاكر البت مستوره بنت ابوك العمده ؟ .. تلاجيك ناسيها حكم كانت زبله مش باينه
م الأرض و ماتوعلهاش
فؤاد : مالها هى كمان ؟
سرحان : دلوجتى بجت عروسه و ايه .. فلجة جشطه كده تهبل ..اللهم إنى صايم
فؤاد : طب والله كويس انك افتكرت اننا صايمين
سرحان : فاكر الوله حسين ؟
فؤاد : حسين مين ؟
سرحان : الوله حسين ابن ابوك ابو سيماعين
فؤاد : ماله ده كمان يا ترى ؟
سرحان : الوله فجأتن كده عوده سرح و بجى إيه .. زى التور .. و تشوفه ياخى و تشوف
تناحته سبحان المولى فى علاه .. الخالج الناطج خاله عبنبى
فؤاد : يا سلام .. كام سنه دلوقت مارحتش البلد
سرحان : بالحَج ( محاولا تنبيه فؤاد فجأة و كأن الموضوع هو الأهم )
فؤاد : إيه خير ؟
سرحان : فاكر الجحش بتاعى ؟ ( يبدو على فؤاد الاستغراب من السؤال ) الجحش بتاعى
اللى كنت داهن ديله ازرج لاجل مايتوهش وسط البهايم اللى فى البلد ( يبدو أن فؤاد
لا يتذكر ) .. إهيه .. الجحش بتاعى اللى كان مسبع وانت هناك الزياره دكهه
فؤاد : المهم ماله ؟
سرحان : ماله ؟ ماله دا ايه ؟ .. بالك دلوجتى الجحش ده بجى بسم الله ما شاء الله .. حمار
كبير من حمير البلد .. لأ و الأكاده إنه بجى متعلم علام حلو جوى .. والا خطوته
لو تشوفها ما تجولش دى خطوة حمار يا فؤاد يا ابن خالتى ..
فؤاد : ( يضحك ) امال ح اقول خطوة بغل يا سرحان؟
سرحان : إحياة كتاب الله المجيد عليه خطوة تجولش مهر ؟ .. حاجه اداره جوى .. حاجه
مملكه
فؤاد : ( ضاحكا ) يا سلام ..طب يا سيدى ربنا يخليهولك
سرحان : تصدج انه بيجطع المسافه م البلد للمحطه فى اتنين و عشرين دجيجه بس؟ تصدج
دى ؟

( صوت صالح من الخارج مناديا )

صالح : فؤاد .. فؤاد ( صوت جرس الباب )
فؤاد : أيوه مين ؟ ( صوت فتح الباب )
صالح : بنسوار فؤاد
فؤاد : أهلا صالح .. اتفضل ( صوت دخول صالح و اغلاق الباب )
سرحان : ( لصالح ) إنت بتجول ايه يا جدع انت ؟
صالح : أوه .. لتيف .. حاجه فانتاستيك خالس .. تريه فانتاستيك .. مش تعرفنا بالاستاذ
يا فؤاد ؟
فؤاد : حضرته يا سيدى الشيخ سرحان .. ابن خالتى
صالح : أوو .. تشرفنا
سرحان : و عين أعيان كفر إجرى منوفيه
صالح : انشانتيه مسيو سرحان
سرحان : مين مين ؟ أشتات إيه ؟
صالح : آن .. شان .. تيه
سرحان : لا يا شيخ قولتلى .. بحسب .. على كل حال اشانطيهك معاك يا خواجه
فؤاد : و حضرته بقى جارى فى السكن .. الأستاذ
صالح : ( مقاطعًا ) صالح محروس .. سكرتيرالمدير التنفيذى لشركة الأسمنت المسلح
سرحان : ( باستغراب و استهزاء ضاحكًا ) إيه ؟ أسمنت إيه ؟
صالح : الأسمنت المسلح إيه فيه إيه ؟
سرحان : لا يا شيخ .. تجصد الأسمنت المسيَّح بجى ( و يضحك ) أسمنت ومسلح كمان؟
أمال من غير مؤاخذه يعنى ...
صالح : إيه فيه إيه مش فاهم أنا
سرحان : يعنى جصدى عدم المؤاخذه اجول لما هو لسمنت حداكو مسلح .. امال مالك طرى
كده ليه ؟ ( ثم كأنه استنتج شيئًا ) .. ايوه ايوه عِدّن البيوت بتجع
صالح : أووو .. ممكن اعتبرها إهانه ؟
فؤاد : لا لا يا صالح هوه مايقصدش
صالح : على فكره بقى ( و يوجه الجمله الى فؤاد ) باردون فؤاد .. ( و يوجه كلامه الى
سرحان ) إنت عارف لو ماكنتش ديف هنا ؟ .. كنت عرفت اتفاهم معاك كويس
.. بس خساره .. إنت راجل فيزيتور هنا
سرحان : إيه ده زى التور دى؟ حيلك حيلك
فؤاد : يا سرحان مابيقولش زى التور
سرحان و يوجه كلامه الى صالح ) أمال ايه اللى انت جولتها فى الآخر دى ؟ .. إنت
ح تلبخ و الليه ؟
فؤاد : لا يا سرحان قصده يقول انك ضيف .. زائر برضه و ليك احترامك
سرحان : ايوه ايوه بحسب .. يجصد يجول انى عابر سبيل هنا يعنى
فؤاد : آآآآآآآيوه
صالح : أوكى .. دونت وورى ملحوقه .. قوللى يا فؤش .. فاضل كام ع المغرب ؟
فؤاد : فاضل يا سيدى تلت ساعه
صالح : أوكى هانت .. عن اذنكم على ما المدفع يدرب ( صوت إشعال كبريت )
سرحان : ( بدهشة و انزعاج ) إيه ده ؟ إيه يا جدع انت ده ؟ ..إنت فاطر و الليه ؟
صالح : و بعدين بأه ؟
سرحان : إنت بتولع سيجاره و انت صايم ؟ .. إنت فاطر و الليه ؟
فؤاد : ( بدهشة ) الله .. ايه ده يا صالح بجد ؟
سرحان : يا سنتك اللى زى وش عمك سرور البواب
صالح : ايه يا جماعه فيه إيه ؟ أما حاجه غريبه فعلا .. مالكم ؟
فؤاد : فعلا هيه حاجه غريبه .. إنسان مسلم و متعلم و صحته كويسه و يفطر رمضان ؟
.. دا يبقى كفر حتى
صالح : أنا متعود على كده يا فؤاد .. عمرى ما صمت .. ثم مقدرش اصوم خالص
سرحان : ما تجدرش تصوم ليه بجى ؟.. نونّه و الاّ نونّه ؟ .. م انت طولى مرتين اهو ..
ما تجدرش تمسك نفسك عن الأكل و الحاجات اللى تغضب ربنا ف رمضان ؟
فؤاد : (بلا مبالاة ) آه .. ( و بتحدى ) إيه بقى ؟
سرحان : تجدر تجوللى ياللى اسمك صالح انت .. ايه الفرج بينك و بين الخواجات ؟
صالح : تقصد ايه بقى ؟ و بعدين يعنى ؟
سرحان : ايه الفرج بينك و بين الخواجه كوهين و الا شارون و الا المرت ده ؟
صالح : ( لفؤاد ) أووووو باردون فؤاد ممكن تحوشه ؟ .. ( لسرحان ) بليز لو سمحت
.. لو سمحت يا عين اعيان كفر امشى إنت
سرحان : ( مقاطعًا ) كفر امشى ؟ هه كفر امشى ايه و كفر إحبى إيه يا فاطر انت ؟ ..
إسمها كفر إجرى منوفيه .. يا فاطر .. يا فاطر بجى انت صالح انت ؟ .. امال
امال الطالح يطلع ايه بجى ؟
صالح : تب عيب كده ..
سرحان : و مش عيب اللى بتعمله ده و كمان حرام ؟ .. أما عجايب والله يا ناس .. طب لما
انت اللى هوه انت صالح .. نجول ايه للفاسد بجى ؟
فؤاد : فى الحقيقه يا صالح دى آخر حاجه كنت اتصورها .. صحيح انك غاوى سهر
و فسح و حاجات زى كده .. لكن مش لدرجة انك تفرط فى حق ربنا و تفطر
رمضان
صالح : باردون فؤش .. أرجو انك تكون متاكد يكينن كده إن كل الناس الهاى لايف ..
مش بتهوب ناحية سيام رمدان .. الناس المشاهير .. الناس الغناى .. مش بيسومو
رمدان .. عادى
سرحان : يا سلام .. أمال لما مابيصومش رمضان بيصومو ايه بجى ؟ أمشير ؟
صالح : ( منفعلا و محتجًا ) أووووه .. باردون أنا بكلم فؤش بس .. مش انت كمان ..
عِرِفت ؟
سرحان : يا سلام .. بجى الأغنيا ما بيصوموش ؟ ربنا يفجرهم امال
فؤاد : تعرف يا صالح اذا كان كلامك مظبوط .. يبقى ح نفضل طول عمرنا مش بنحس
بآلام بعضنا .. ح يفضل الجعان جعان طول عمره .. و المحروم ح يفضل على
طول محروم ..لأن فيه كتير مننا ما بيحاولوش حتى يجربو ايه هو الجوع ..
و بكده ح يفضل المستهترين فى سهراتهم و فجورهم مش ح يتغيرو و حيبصو
للراجل المؤمن على انه لازم يفضل فقير محتاج .. و ان الأغنيا و الناس الهاى
اللى انت بتتكلم عنهم أغنيا حتى على فرض ربنا .. و ان من حقهم عدم الصوم
و اللى انت فاكر إنك منّهم
سرحان : و مين جال ان الأغنيا ما بيصوموش ؟ و هوه ده يبجى غِنَى برضه ؟ .. بجى
انت يا نتاع شركة السفلت و الزفت المسيح انت من ضمن الأغنيا ؟ .. دى
الحكايه بس دناوة نفس ليس إلاّ
فؤاد : دى الحقيقه يا شيخ سرحان ..غنسان شاب ماعندوش الاراده القويه اللى تخليه
يصوم .. راجل مودرن معدته يا عينى ما تستحملش الجوع
صالح : الحكايه مش حكاية جوع يا فؤاد .. و عموما لا تكلك و لا تزعل نفسك .. لك عليَّه
يا سيدى اذا كان المودوع مودوع أكل .. لك عليه من بكره بكره مش ممكن ادوق
اى اكل غير بعد المغرب
سرحان : إهيه .. يعنى تجوع نفسك و تبطل أكل و شب و تجوم شارب سجاير و تجوللى
صايم ؟
فؤاد : مش هوه ده الصيام يا صالح .. الرسول عليه الصلاة و السلام قال
سرحان : اللهم صلى عليك يا نبى
فؤاد : من لم يدع قول الزور و العمل به فليس لله حاجة فى أن يدع طعامه و شرابه
سرحان : يا سلام على الكلام الحلو .. دا حتى الشيخ مبروك شيخ الجامع اللى ف بلدنا
بيجول ان ربنا سبحانه و تعالى جال " إن كل عمل ابن آدم له إلا الصوم فهو
لى و أنا أجزى به "
فؤاد : و فيه حديث نبوى شريف معناه إنه اا جاء رمضان فتحت ابواب الجنة و غلقت
ابواب النار و صفدت الشياطين
سرحان : يا جماعه ده شهر مفترج كله بركه .. نجوم نغضب فيه ربنا ؟
فؤاد : ما تنساش يا صالح ان ربنا له حكم كتيره فى الصيام .. كمان الطب أثبت ان
الصيام له فوائد كتير صحيه .. و بعدين النبى عليه الصلاة و السلام ماهو قال
" صوموا تصحوا "
سرحان : لأ ازاى يصوم ؟ هو احنا شاطرين غير فى الحشر ؟ .. مش عارف النفر من
دول ح يجابل ربنا ازاى يوم الجيامه ؟ .. بالذمه ح يجول لربنا ايه ؟ .. معلش
لحسن انا كت جعان ؟
فؤاد : لا يا حبيبى يوم القيامه ده موضوع تانى .. يومها ما حدش ح ينفع حد .. لا أب
ولا اخ ولا فلوس ولا جاه ولا سلطان ..مش ح ينفعك غير عملك و بس .. يوم
لا ينفع مال ولا بنون الا من اتى الله بقلب سليم
سرحان : يا سلام على كلام ربنا ..( يوجه كلامه إلى صالح ) سامع؟ .. سامع الكلام اللى
يخلى الحجر ينطج ؟ .. على الله يكون حوج فيك ان شالله
صالح : و مين يسمع الكلام ده و مايصومش ؟ .. مين يسمع كلام ربنا و مايترعبش
من يوم الآخره ؟ .. ( متأثرًا ) سرحان .. فؤاد .. أرجوكم .. أرجوكم كفايه
كده .. بس إدعولى
فؤاد : إن الله غفور رحيم يا صالح .. و ندعو الله عز و جل فى علاه لك بالهدايه
و انت كمان معدنك طيب يا صالح و ربنا تواب غفور رحيم .. ندعوه فى
علاه .. اللهم أعنا على ذكرك و شكرك و طاعتك و حسن عبادتك .. اللهم
آمين ( صوت سرحان و صالح معا يقولان " آمين " ).. ربنا كبير يا صالح
و زى ماهوه شديد العقاب .. هو برضه ارحم الراحمين
سرحان : هو الغفور الرحيم صحيح بس المهم التوبه تكون نصوحه
فؤاد : ربنا غفور رحيم بالناس المؤمنه بيه و بينفذوا تعاليم الإسلام .. للناس اللى
بيخافو من غضبه
سرحان : توب يا صالح و ارجع لعجلك و سيبك من صحاب السوء اللى بيجووك على
كده .. توب و اعرف ربنا بجلب خالص و نيه صافيه
فؤاد : و ربنا بيقول فى كتابه العزيز : " و أما من تاب و آمن و عمل عملا صالحًا
أولئك يبدل الله سيئاتهم حسنات " صدق الله العظيم
سرحان : صدج الله العظيم .. توب يا صالح توب .. توب لله الهى يهديك بهداه .. دا
شهر خير مفترج و الصيام فيه نعمه .. طب إحياة النبى الصوم دا صحه
و طهاره

( صوت المبتهل من الخارج )
يا هادى الكون بهداك اهدينا يا ربى و اسبل علينا سترك و رحمتك و رضاك
دا شهر خير مفترج ع الكل يا ربى فيه تقبل التوبه يا خالق الوجود رحماك
نصيحه لك ي ابن آدم الحق يوم رمضان و فوز بعفو الغفور دى الجنه بيه تلقاك
دا الصوم طهاره و عفه و رحمه للإنسان يوم ما القبور تجمعك ياللى التراب متواك
أترك غرورك ى ابن آدم و العن الشيطان و اذكر يا عبد يوم راح تلقى فيه مولاك

صالح : يا رب اهدينى يا رب .. و اقبل توبتى يا رب ( سرحان و فؤاد يقولان آمين )
يا رب ساعدنى على طاعتك و عبادتك ورضاك عنى ( يؤمن سرحان و فؤاد
على الدعاء ) يا رب اقبل منى دعايا و استجيب يا رب .. و اهدنى و اهدى
أمتى فى شهرك الكريم يا رب .. يا سميع الدعاء و قابل التوب و غافر الذنب
لا إله إلا انت وحدك .. سبحانك إنى كنت من الظالمين
( الجميع يرددون معا لفظة " آمين " ثم ينطلق صوت المؤذن معلنا
أذان المغرب و يبدو صوت الأذان منطلقًا من أكثر من جهة لتنتهى التمثيلية
بموسيقى النهاية مع نهاية الأذان )

النهاية

» قصيدة " سهرة " .. للشاعر/ علاء الدين سعيد
» الأوبريت الغنائى صندوق الدنيا .. تأليف الشاعر / علاء الدين سعيد
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) ..الأبيات الأولى
» قصيدة " ضوء البردة " .. للشاعر / علاء الدين سعيد ( مِيمِيَّة ُ علاء الدين فى مدحِ سيّدِ المرسلين ) الأبيات الأولى
» " من أنت ِ ؟! " .. قصيدة الشاعر / علاء الدين سعيد