مكتبة مؤلفات الشاعر علاء الدين سعيد
أحباءَنا الأفاضل ..
السلام عليكم و رحمة الله و بركاته
رسالة ترحيب و حب نبثها من القلب إلى كل الأعضاء و العضوات و الراغبين فى الإنضمام إلى موقعنا المتميز - مكتبة مؤلفات الشاعرعلاء الدين سعيد - متمنين للجميع المتعة و الفائدة الكبيرة و المشاركة المثمرة فى ظل الالتزام بقواعد الدين و الأخلاق و الرغبة الصادقة فى تنمية الثقافة و روح المحبة لدى الجميع و نحو الموقع و الحفاظ عليه .. فأهلا و سهلا بكم معنا .. أعضاءَ فاعلين نشطاء دائما بإذن الله .. أهلا بكم و سهلا

مكتبة مؤلفات الشاعر علاء الدين سعيد

هنا مكتبة مؤلفات الشاعر علاء الدين سعيد .. تتعدد مجالاتها ، و هنا نحاول حصرها و إتاحتها للقارىء فى كل مكان .. فمرحبا بكم
 
الرئيسيةالبوابةاليوميةس .و .جبحـثقائمة الاعضاءالمجموعاتالتسجيلدخول
أهلا و سهلا بكم على موقع مكتبة مؤلفات الشاعر علاء الدين سعيد - ضع اعلانك هنا ، تضمن نشره و نجاحك ..معنا حقق أمنياتك و أحلامك ..
دعوة إلى أعضاء أسرة الموقع الأعزاء للإنضمام إلى عضوية " موقع الشاعر علاء الدين سعيد ، للفنون و الآداب و العلوم الإجتماعيَّة " مبدعين و ذواقة نسعد بهم على الرابط التالى : http://alauddin.alafdal.net فأهلا بكم و سهلا بيننا .
" صحيفة " الوطن العربى " .. صحيفة أسبوعية مستقلة شاملة .. تصدر صباح كل خميس من القاهرة ، و متجددة يوميا بكل جديد .. رئيس مجلس الإدارة و رئيس التحرير:علاء الدين سعيد .. رابط موقع الصحيفة : http://kenanaonline.com/alwatanularaby
لغة الموقع
أختر لغة الموقع ...
النسخ من الموقع غير متاح
دخول
اسم العضو:
كلمة السر:
ادخلني بشكل آلي عند زيارتي مرة اخرى: 
:: لقد نسيت كلمة السر
المواضيع الأخيرة
» مونودراما شعريَّة " ‏مملكة كَفر الغَلابَه " للشاعر علاء الدين سعيد
السبت 25 مايو 2013, 12:05 am من طرف الاميرة

» جمعه مباركه ان شاء الله
الإثنين 11 أكتوبر 2010, 2:59 pm من طرف Admin

» جدول يومي في رمضان
الإثنين 11 أكتوبر 2010, 2:58 pm من طرف Admin

»  نداء رمضان.. يا باغي الخير أقبل
الإثنين 11 أكتوبر 2010, 2:57 pm من طرف Admin

» آداب الصيام
السبت 11 سبتمبر 2010, 1:47 am من طرف Admin

» هلال رمضان
السبت 11 سبتمبر 2010, 1:46 am من طرف Admin

» تاريخ الصيام
السبت 11 سبتمبر 2010, 1:45 am من طرف Admin

» خصائص شهر رمضان
السبت 11 سبتمبر 2010, 1:43 am من طرف Admin

»  العفو والغفران في شهر رمضان
السبت 11 سبتمبر 2010, 1:42 am من طرف Admin

المواضيع الأكثر نشاطاً
مونودراما شعريَّة " ‏مملكة كَفر الغَلابَه " للشاعر علاء الدين سعيد
المواضيع الأكثر شعبية
" أوَيَدرى ؟! ".. قصيدة الشاعر/ علاء الدين سعيد
الإعجاز العددى فى سورة الإسراء ، و زوال إسرائيل
ما معنى الصمد ؟ ، و كم مرة ذكر في القرآن الكريم ؟
أحد أفضل عشرة شعراء عرب فى العصر الحديث
تراجم عظماء القراء أصحاب الروايات الأربعة عشر فى قراءة القرآن الكريم
مونودراما شعريَّة " ‏مملكة كَفر الغَلابَه " للشاعر علاء الدين سعيد
قصيدة " رسالة شهيد" .. للشاعر/ علاء الدين سعيد
العفو والغفران في شهر رمضان
خصائص شهر رمضان
تاريخ الصيام
أفضل 10 فاتحي مواضيع في المنتدى
Admin
 
أفضل 10 أعضاء في هذا الأسبوع
أفضل 10 أعضاء في هذا الشهر
أفضل 10 أعضاء في هذا المنتدى
Admin
 
الاميرة
 
احصائيات
هذا المنتدى يتوفر على 3 عُضو.
آخر عُضو مُسجل هو الاميرة فمرحباً به.

أعضاؤنا قدموا 89 مساهمة في هذا المنتدى في 88 موضوع
إعلانات ---
شاطر | 
 

 مونودراما شعريَّة " ‏مملكة كَفر الغَلابَه " للشاعر علاء الدين سعيد

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


ذكر

إسم الدولة - إسم المدينة: جمهورية مصر العربية - القاهرة

رقم العضوية: 2
تاريخ التسجيل: 06/09/2010
الموقع:
عدد المساهمات: 89
نقاط: 15064
درجة النشاط فى الموقع: 0

مُساهمةموضوع: مونودراما شعريَّة " ‏مملكة كَفر الغَلابَه " للشاعر علاء الدين سعيد    الثلاثاء 07 سبتمبر 2010, 9:52 am

مونودراما شعريَّة


‏مملكة كَفر الغَلابَه

للشاعر

علاء الدين سعيد


**************************




متبصّليش

و انتى كمان .. متبصليش

متبصوليش و انتو ف عنيكو مِيت سؤال

أصل الإجابه مش مُحَال

أنا جيت لكم

شايل ملامح قصتى ف مليون سؤال

حيران ما بين ازَّاى و لِيْه

إمتى و فين كان المجال ؟!

على اى حال

معرفش إيه من قصتى كان الحقيقه و إيه خيال

و ارجع و اقول

على أىّ حال

المسأله مش خبط لَزق نزُقّها لعقول جنابكم

و المَثل ينفع مِثال

" الضغط آخره لانفجار "

و انتم غلابه زَىْ حالاتى

جيتوا راميين هَمّكم ورا ضهركم

خايفين لا يوم تصبح همومكم فوق ملامح وشّكم

بس الحقيقه

2

تقلَهَا على ضهركم كده كلكم

خلاَّكوا تِحنوا ضهرُكُم

وَطّيتوا من غير قصدُكُم

و عرفتوا إن انتو انحنيتوا وْ كلّ ده ولا هَمّكم

الكل باصص تحت مش باصص لفوق

الكل خايف يوم يبص لفوق يفوق

على الحقيقه المُرَّه فِ عيون الندم

إن الألم

ماسك قلم

قاعد يسجل بيه ف دفتر قسوته

إسم الذليل اللى عَلِيْه الدور بيبدأ من جديد

عشان يعوَّض بَصّته لفوق

بالمزيد مِ المَسكَنَه

شوف كام سنه

يندم معاها إنّه شاف يوم كان سعيد

و ارجَع و اقول يوم كان سعيد ..

و " كان "

بترفع كل كلمه بَعدَهَا

من سِكّتى

3

و بتنصب الخبَر اللى كان

من قسمتى ،

و اللى كان

يا خساره مات

أصبح هوامش ف الحياه

أو صوره حَيَّه

للمَمَات ..

أصبح يا عينى ذكريات ،

لكن أنا

أنا مين أنا ؟!

أنا مين هنا ؟!

الذكريات فاتت خلاص من كام سنه

فاتت و انا بَسأَلْ :

أنا دلوقت مين؟!

كلّ اللى عارفه

إنّى دلوقت المَلِكْ

فوق عَرش كلّ المحتاجين

و انّ الزَمَن نَصَّبنى فوقهم

أصلى قادر ع السؤال ،

4

و بقيت مَلِكْ

فوق عرش كل المحتاجين ..

أيْوَه الملك فوق عرش كل المحتاجين

أوعى تنازعنى المملكه

م انا و انت صوره لبعضنا

يمكن تكون انت

أنا ..

لو كنت زَىّ القمحَه وِسط تروس فِ قلب المَطحَنه

تبقى أنا ..

لو كنت زَىّ الشمعه لو قادت لِحَدّ ما تنتهى و لا تنطِفِىْ

علشان تنوَّر يوم لغيرها فْ ضلمِته

و يشوف بنورها سِكته

تبقى أنا ..

لو كنت مولود تحت رجلين دنيتك

و الكل دايسين فوق رقبتك فِ الزحام

دايسين على لسانك لا ينطق بالملام

بيبيعو ف الزحمه الكلام و احنا علينا نبلعه

و بتبلعه

و الجوع و هُوَّه بينهشولك مِعدِتك

5

تبقى أنا ..

لو كنت " كُوْنت " المَسأَلَه

تبقى أنا ..

د انا حتى إسمى

" فقر فقران مِفتِقِر عبد الغنى "

و الشهره لاجل السَتر مكتوبه فْ شهادة خَرجتِىْ

" صابر شكور حامد على الله مِعتِمِد "

عنوانى

"حارة شِدّ حِيْلَك "

ح تلاقيها حاره سَدّ و بيتى ع الناحيه الشِمال

زَىّ الزَمَن ..

أمّا الرقم معروف

" تلتاشر "

ح تسأل أىّ شحَّات

راح يجيبك بالعَجَلْ ..

مولود فِ حَىّ الفخفخه

مولود ف حى الفخفخه لاجل المَذَلَّه م َ تِكتِمِل

حَكِمِ اللى عايز يوم تِذِلُّه

حَنّسُه

6

وَرّيْلُه شكل النعمه إيه

و ماتِدّيلوش مهما عَمَلْ

إقطع عَلِيْه حَتّى الأملْ

و اهو دا اللى وَيَّايا

حَصَلْ ...

أبويا كان قاعد مع امّى فْ ليله آخر زهزهه

و الحلوه كانت فِ الحلاوه

أُبَّهَه ،

قام قال لها :

م َ تياللا بينا نجيب وَلَد ..

قالت له : بنت تكون علينا حنيّنه ..

قام قال لها :

قلنا ولد يعنى ولد

حتى الولد

يبقى دراعى و عزوتى يوم وحدتى

يبقى السند و الضهر لحظة شدّتى ..

قالت له : خلّيها على الله و اعتِمِد

بقى يعنى ده وقت اختيار بنت و ولد؟!


7

أمّا صحيح راجل نكد ..

ضحك الشقى ضِحكِة رِضا

كدا وْ كده

و قال لنفسه :

ياد لايمها لا الحكايه تنقلب قلة أدب

لا تطول من الشام البلح

و لا حتى م اليمن العنب

لاجل م يكمّل فصول المَهزَلَه ..

و اتجَمَّعوا

ف مؤامره كانت مُعضِلَه

ف ليله ضلمه مقندله بقنديل ف لون دمّى

و كانت دى بداية المشكله

إتمتعوا و اتمطعوا

و اتبحبحوا و اترحرحوا وْ فرحوا سوا و ضحكوا سوا

و الضحكه رَنّت جوّه تكوينى

بتِكوينى

منيش عارف دى ضحكة فرحه بيَّه

و الاَّ ضحكة تريَقه ..

قالوا الولد ح يكون خفيف الدمّ و يحب المَرَح

8

و مهما يعمل فيه زمانه

عمره منّه ما ينجَرَح ..

و الضحكه رَنّت جوّه مِنّى فْ وحدتى

لحد لحظة خرجتى

من دنيتى

لدنيتى

أو للى كنت فاكرها مَرَّه

دنيتى ..

قابلت لون الضحك فوق كل الوشوش

بعيون نضيفه مغمَّضه ..

قابلت صوت الضحك بصراخى و بكايا

كأنى حسّيت

باللى راح يجرى معايا

بَسّ آآآآآآآآه من دى سياسه

سكتتنى الطبطبه

يكفيكوا شر الطبطبه

لو كات سياسه

للسكات ..


9

و فضلت ساكت وَىَّ كُتر الطبطبه

شوف كام سنه

فقت و لقيتنى بَعدَها

مَلِكْ بلاد المَسكنه

فوق عرش كل المحتاجين ..

و الأصل من قبل الميلاد

إنّى ابن عِزّ وْ نغنغه

مولود على رأى المَثل

وِفْ بُقى معلَقه من دَهَب

وِفْ ساعه كات ساعة رضا

يوم جمعه فِ دخول الصَلا

و اليوم دا كان أوّل رَجَب

شفتو العَجَب ؟!

تقولش هالل ع الوجود سيدى بشر أو شيخ العَرَبْ ؟ ..

قالوا دا واد مبروك وله أصل و نسَب

و الاَّ انتو ناسيين الإمام سيدنا " الجيلانى " والعَصَب ؟

ماهو أصل سَيِّدنا

مُنَسَّبْ للإمام سِيدنا الحسين


10

وِفْ نفس ذات الوَقت جدّ جدود أبو البيه الوليد

يعنى الفرَح بالنونو أصبح فرحتين

فرحة ميلاده و فرحة النسل المديد

مبروك صحيح يا حفيد سعيد

يا مَدّ من سلسال لآل البيت أكيد

شى الله يا سَيّدنا الإمام

يا " سيدى عبد القادر الجيلانى " يا مَنبَت " سعيد "

جدّ اللى جاب جدّ الوليد

" سِيْدِى سَعيد "

اللى المقام تشهدله بيه " بلبيس " و له مُوْلِد كبير

" مسعَد " على رأى العوام

يا جدّنا الغالى " سعيد" ..

رَدُّوا خالاتى و قالوا ناسيين أصلنا ؟

ناسيين والدنا الشيخ رياض ؟

" الشيخ رياض صالح "

كبير عيلة الصوالح فِ الصعيد

جه م الصعيد سكن البلد دى و حَبَّها

أخلَص لناسها و أهلها

إدَّاها ياما وْ خد محبّة قلبها

11

كان شيخ طريقته الحامديَّه الشاذليَّه فْ عزّها

و كان صديق شيخ المشايخ وقتها

سيدى " سلامه الراضى "رحمه و نور عليه

شى الله يا سِيدنا أبو الحسن يا شاذُلِىْ

شى الله يا سَيِّدنا الحسين ..

بصيت لهم و سألت هل بيخرفوا ؟

عيلتين بجد يشرفوا

أنا ابقى مين بينهم بقى ؟!!!

ناقص يقولوا انى وَلِى

و اللمه دى مولد عشانى بيتعمل يوم مَولِدِى

يا فرحتى بالعيله دى و العيله دى

وَلِىْ وَلِىْ

بسّ المهم يرضعونى و السلام

ما خلاص لبست العِمَّه فِ دماغى و قلبى المَسبَحَه ..

يا فرحتى بالعِمَّه لَمَّا اتقلوَظِت

و امّ اسماعين أوّل ما عِلْمِت زرغدت

و الاَّ امّ لطفى

لَمَّا خشّت صَوَّتت

قالت حُوشوه

12

إنتو انهبلتوا و الاَّ إيه ؟!

الواد مربرب

جسمه بفته

و الا شوفتوا لون عنيه ؟

الننى إسود و العيون ربّانى جَت مِتكحَّله

و الشعر نازل ع الكتاف زىّ الحرير شوفوا طوله إيه؟

و يا دوب مالوش ساعتين مشرفنا القمر

إنتو انهبلتوا و الاَّ إيه ؟

داروا عليه

داروا الولد لاحسن لواحظ تحسده

معلوم لواحظ عينها تفلق ميت حجر ...

معرفش ليه بصولها و الكل انكتم

الكل بحلق و العيون ليه فنجلت ؟

ليه اللى كات فرحانه بيّه اتعكننت ؟

ليه اللى كات شايلانى فجأه اتبرجلت ؟

وأوأت يمكن حَدّ ينطق و افهم اللى بيجرى إيه

و لا حَدّ عَبَّرنى و لا اللى سمع فهم

أنا قلت مِتجَاهْلِنّى يا ولاد الكلاب ؟!

و الله لاهريكم ظراب ..

13

عنها و رزعت اتنين على الريحه الملايكى العمبرى ..

ضحكوا خالاتى و قالوا إحزق و انجلِى

إسمَلَّه من أولها راجل فنجرى ..

ردت و قالت عمتى :

خمسه عليه

مش خايفه غير من ام لطفى إلهى عينها تنخرم

أم العيون الصفراويه بنظره تفلق ميت هرم

آل إيه لواحظ تحسده

طب دى ضريره

شفتوا أغرب من كده ؟!!! ...

عنها و صوت زيطه ف شارعنا الكل سامعينها عَلِت

صوت ألف عَيّل يمكن اكتر

صوت ناس كبار بيقولوا : عيب

عيب يا ولد ياللا اختشى

إمشى يا بت

و صوات و آه يامَّه الحقينى و شفت مين بأه حَدّفِت

لأ لأ بلاش الطوب بلاش قلة أدب ..

هيصه و غاغه و دنيا فجأه اتكركبت


14

وف ثانيتين

سمعت صوت الخبط ع الباب زلزله

ردّت و قالت عمتى :

ييه .. دى جَت ..

إتنرفزت خالتى و قالت :

شوفتوا بنت الهبله ح تخض الوَله ..

و سمعت صوت بابنا انفتح

خشى قوام يا مدهوله

فجأه و صوت فشر الهدد

قالوا امّ فتحى اتكعبلت

قالو يا عينى جسمها من تخنه ع الأرض انهبد ..

سَألِت مرات عمى و قالت :

مين بأه الست ام فتحى يا ترى؟

قالت لها خالتى :

و فيه مخلوق مايعرفش ام فتحى المَسخرَه ؟!

دى ست بالله و العيال سموها من هبالتها " وَش "

ماهى دى ام فتحى العمشه سلفة زوزو بنت حسين كدَش

متجوزه المدعوق عَلِى الدُكش اللَبَش

ماهو برضه أهبل زيّها و اهى جوازه و السلام ..

15

ردّت برقّة قلبها أمّى الحنونه الطيبه

قالت كفايه ى ام هاشم إنتى إيه ماتبطليش ؟

سيبى البنيَّه زىّ خلق الله تعيش

مش دى اللى كانت صاحبتك غيرشى الظروف جارت عليها ؟

قالوا ملبوسه و قالوا اتجننت

و ناس قالولنا دى ست مبروكه بصحيح

أهى ف النهايه يا عينى فجأه اتبهدِلِت

إتفضلى هنا ى امّ فتحى أدخلى ..

بصيت لقيت الأوضه فجأه

غيّمِت

بصيت بطرطوفة عِنيَّه لقيت جبل اسمه امّ فتحى المَسخرَه

متنعكشه و متدروشه و مفرفشه و مكعبره

هتمه بصحيح و مطرَّمَه لكنها

مِتبَسِّمَه

جواها قلب و روح و حس و ملحمه لو تنكتب

عايزالها مليون مَلزَمَه

متركبه تركيبه مش متنغمه لكنها

كونشرتو كامل من مشاعر مخلصه

جت ناحيتى

16

قعدت تبربشلى بعينيها بربشه و قالت :

أبوث النونو بوثه ثخيَّرَه ..

قالت لها أمى : يا روحى اتفضلى ..

هَجَمِت عَلَيَّه المغرمه الست ام فتحى بتقلها

وف ثانيه كنت ف حضنها

عصرتنى جامد

قلت يا ربى أنا مش قدَّها

و لقيتنى محشور بين خبايا صدرها

و كأنها عايزانى أكشف جوه منها سرَّها

غيرشى استنادى كان أكيد على كرشها

حسسنى حَبَّه بانفراج و بإنى طِيْرَه ف عشها

لكن عشان صادق بطبعى

قلت ليه راح اغشها

م اقبلش انا غير حضن أمى

أصل انا

مَدّ لجذورى

و ابن أغلى بذور سليلة عرشها

بس ام فتحى نازله بوس فِيَّّه و شفط و رجرجه و لا زلزله

آل إيه بأه

17

الرجرجه دى هنهنه

و فضلت ألعن جوه منى ف أىّ بوس وف اللى باس

أصل الل

باس

سبب المشاكل كلها و لولا الل

باس

ما كنت يوم ح القى ام فتحى

جت و نازله شفط فِيَّه بحجة انّ الشفط بوس

و فضلت أبكى لأمى و اشكى و سقت انا

ف الوأوأه

فوقوا بأه

شِدُّونى منها اتصرَّفوا

فكونى من دى شرنقه ..

و سمعت فِيَّه قصيده م الشِعر اللاوندى

نَظمَهَا لمهراجا هندى

مش بيفهم حاجه من دى

و اللى من دى حروف سَكلّى و تأتأه

بتقول و عينها مبربشه

وف ثانيه تبقى مبحلقه :

18

الله حَلِيها بتّ ثىّ الثكلَه

مِكَببه و مكلبِثَه و مكَلبَثه

إيه إثمها بأه يا مَلَه ؟

أقول لكم ثمُّوها إيه؟

ثمُّوْها نونو كحبَلَه

هاهاهأ .. هاهأ

مُث حلوه بَلْطه كحبَله ؟ ..

ضحك اللى كان موجود معانا وقتها

و قالولها يا وَش افهَمِى

اللى انتى شايلاه ده

وَلَه ..

ردت و قالت : و النبى ؟

لأ لأ ختوه منّى قوام

أنا واحته ثِت و ثايله لاكِلْ ؟ .. لأ

حَلام ..

قالولها هاتى دانتى هِبله مْأصَّلَه

هاتيه قوام ح تريَّحِيْه م البهدله ..

هاتك يا ضحك من اللى كانوا موجودين

و رجعت تانى لحضن أمى

19

و الحنين

تضمنى و اطلُب كمان

تضمنى و اشبَع حنان

و القى الأمان

لمَّا فْ عِنِيها تحطنى و نظرة عِنِيها تشدّنى

و تلفنى فوق لفتى لفه كمان

من نظره حلوه لست كل الكل أمى ألاقى كل الكون جنان

فى رقته

وف بهجته

وف مهجته القانى دافى بأمر من نظره

لأمى

آه يا أمى

ع اللى فاتنى

و اللى كان ..

و عرفت من نظرة حنان أمى الكتير

عرفت معنى القلب لمَّا يكون حرير

عرفت معنى القلب لمَّا يكون بَرَاح

يقدر يساعى الناس



20

وفيه ترتاح .

كانت

و كانت ذكريات

و الذكريات

وخدانى للعمر اللى فات

أيام ما كانت دنيتى حبّة أغانى و حكايات

تحكيها دايمًا جدتى قبل العيون ما تعوز تنام

و ابقى بنام

و الحلم شايفاه العيون قبل المنام ..

ألقانى عقلة الصباع ،

أو عنتره الشهم الهمام

أو أمنا الغوله بتيجى

وف هدووووووووء

من غير كلام

طالبه الحنان مش لانتقام ..

أدّيها من نبع البراءه جوّه قلبى


21

مِ الحنان ..

و الصبح عصفوره على الشباك

تغنى

غنوة اليوم الجديد

و تقوللى إصحى الصبح لاح

و الماضى راح

و الكون براح

قوم و ابتدى اليوم الجديد

قوم بدرى تلقى اليوم سعيد ..

و ِ افرَح و ظأطت

و اجرى و اتنطت

ح تلقى اليوم دا عيد ..

و القى الصحاب

جُمْ من بعيد متجمَّعين

تلقانا صحبة ورد حلوه منورين

نجرى و نلعب بالحياه

22

مش مشغولين ولا مهمومين ..

كان الأمل

إن احنا نفضل بالحياه

متهنيين ..

و كبرنا حَبَّه

من حضانه لابتدائى منقولين ..

و ادّونا فِ كتاب الحساب

إن العَدَد يبدأ بصفر

و عرفنا إنه أىّ شىء مالهوش وجود

يبقى اسمه صفر

لكن بنبدأ عَدّ بيه

ح تقولو ليه؟!

بصّوا عليه

لو كنا نكتب صفر وحده يبقى فعلاً مش مهم

و ان كان رقم نكتب شماله صفر برضه مش مهم

لكن دا رغم الصفر صفر


23

قيمته على الناحيه اليمين

و عرفنا برضه إن بعد الصفر واحد

هوّه أوّل كل شىء فى الكون صحيح ..

برضه ف كتاب الدين عرفنا

إن رب الكون دا واحد

و اللى ينكر نعمته دا يبقى جاحد

هوّه خالقنى و خالق كل واحد

هوّه خالق الخلايق

اللى جايّه

و اللى راحت

و اللى عايشه

و اللى ماتت ..

هوّه رزاق الوجود من غير حدود ..

و عرفنا فِ كتاب القراءه يعنى إيه معنى البراءه

لو أسامح فِ الإساءه

لو نعلّوا نفسنا فوق الدناءه


24

لو نخلّوا قلوبنا صافيه كلنا

لو حُبّنا

نابع صحيح من قلبنا ..

و عرفنا فِ كتاب العلوم

معنى القلوب

نبض القلوب

و المعده منبع للعيوب

بيها المرض ممكن يدوم

بيها كمان ممكن يدوب فى يوم

أو التانى يا دوب

إن كات تصوم

و الصوم دا عِفـَّه

و العفاف فِ الأصل دِين

و الدِين علوم

و العلم نور

و النور دا له أشكال كتير ..


25

الجرأه وسط الجبن نور

و الحق لو ينقال لأهل الظلم نور

و العدل بين الناس دا نور

و الحب بينهم برضه نور

و البسمه فوق كل الوجوه

لو مِ القلوب

بتشِعّ نور ..

و التقوى لو جوّه القلوب

تلقى القلوب مليانه نور

و ارجع و اقول

العلم نور ..

و عرفنا جغرافية بلادنا

من دروسها إستفدنا

شُفنا إيه هِيّه حدودنا ..

فيه فلسطين شرقنا

ع البحر لاحمر شطنا


26

ليبيا الحبيبه غربنا

و البحر لابيض فِ الشَمَال

و احنا اللى فِ شْمال السودان

و النهر جاى من عند أولاد الجنوب بيقول لنا :

أفريقيا بتسلم عليكم و السودان إيدها فْ إديكم

ياللى فِ الشِدَّه نلاقيكم

إخوه ليكم ف الجنوب ..

قلناله : مرحب بَك يا نيل

مرحب يا راوى أرضنا

بالحب و الخير و الهنا

بالخير بتيجى لحدّنا

تِملَى السعاده قلبنا ..

من مِيّتك يشفى العليل

من فرحِتَك الكون جميل

و نغنى و نقول عين يا ليل

يرخص فِ حُبَّك الضنا


27

الغالى عند امّىْ

أنا ..

لكن أنا

أنا مين أنا ؟!

أنا مين هنا ؟!

الذكريات فاتت خلاص من كام سنه

فاتت و انا بسأل أنا دلوقت مين

كل اللى عارفه أنى دلوقت الملِك

فوق عرش كل المحتاجين

و بلادى غير كل البلاد

بلادى طينة أرضها حُب وْ وَفا

بلادى طيبة قلبها حضن و دفا

بلادى فيها نهر جارى الصبر فِيْه

يروى الغلابه المحتاجين

مَيَّه

و طِين


28

البذره فِيه تطرح سنابل يحصدوا منها الصفا

يدّوها بأديهم زكايب

للكبار الشبعانين

و الأجر

ضرب على ال

قـفا ..

م َ الشبعانين قادرين على رفع الأدين

مش شبعانين ؟!

و المحتاجين يا خساره حانيين الجبين

مابينفردش ف جسمهم

غير القفا

هوَّه الشِفا على رأى جيل مِنّه انهَرَى و قالها حِكمَه و اختفى

و فضل لنا الهَمّ الكبير

قوت الفقير

بيت الفقير

لِبس الفقير


29

موت الفقير

و الناس

و قيمة الناس

فِ أسواق ال

حِمِير

بتشيل قليل

بتشيل كتير

حِملَك صُغيَّر و الاَّ حِملَك كان كبير

أصلك خفير و الاّ وزير

لو حتى كان أصلك أمير

العِبرَه بالتسعيره ح تكون تقل جيبك بالفلوس ..

ملعون أبو اللى يقول فلوس

دى ياما بتغيّر نفوس

ناس بيها تشرب فى كئوس

خمره

و تاكل كالتيوس


30

و جيران يا عينى فى عبوس

إن جابوا عيش مايجيش غموس

ملعون أبو اللى يقول فلوس ..

آآآآآآآآآآآآ ه منّها و من فعلها

بتفرق الأحباب كتير

إتنين و حبوا بعضهم و الحب كان مولود كبير

فرحوا و هاموا ف حبهم بقلوب و كانت

من حرير

و القرش كان فى عرفهم زى أى شىء تافه حقير

لكن يا عينى ع الزمن لما الفلوس تعمى النفوس ..

البنت اقدم لها هايف معاه حبة فلوس

جم يقنعوها أهلها :

دا معاه فلوس فيها نغوص

ف البنك له حبة فلوس لو عديناها راح نلوص

عنده العماره لوحدها راح تنكتبلك لو نعوز ..

البنت قالت لامها :


31

" صابر شكور" عشرة زمان

و العهد بينّا إننا نفضل على حب و حنان

مقدرش ى امه أخدعه و ارضى بغيره مهما كان ..

ردت و قالت أمها :

جك خيبه زى اختك أمال

إتجوزت واحد فقير اتبهدلت بنت الحلال

ليه ماتكونيش زى اعتدال عايشه ف هنا مالهوش مثال ؟!

أتجوزت واحد غنى عاشت معاه آخر جمال

لا ف مره ياختى اتبهدلت

ولا مره قالت مامعاييش

و لا جت لى مره تستلف و تقوللى ى امه فلوس مفيش

و الا الهدايا اللى لنا من عندها

مابتنتهيش ،

وافقى يابنتى و اعقلى

و ف اسمه إيه متفكريش ..

البنت عاشت ف الخيال


32

بيت راح يكون مكتوب لها

و فلوس كتير ماليه البنوك

ح تهِيص على رأى امها

و الهيصه ح تعم الجميع

هيّه و صحابها و أهلها

و ان كان ناقصها أى شىء ،

حالاً ح ييجى لحدّها ..

البنت وافقت أمها

بس الحبيب

قصدى الفقير ح تقولّه إيه ؟ ..

ردّت و قالت أمها :

و انتى تقوليله ياختى ليه؟

بس انتى عنه ابعدى و اياكى بس تفهميه

سيبى الظروف دى لوحدها ح تفهمه

لو كان نبيه ..

و فهمت أصل المسأله


33

أصلى ف زمان الإنفتاح

و الإنفتاح

عايز نفتح مخنا

دى تعليمات الإنفتاح و حياة كتاب الله صحيح

من تعليمات حضرة جناب الإنفتاح

إنك تسيب أرضك و دارك وىّ عِرضك للغريب

و تشيل حمولك فوق كتافك كوم تقيل

وىَّ الهموم اللى بحمولها راح تميل

و تشد كل جذور حنينك للوطن من أصلها و ترحل بعيد

ما الدنيا واسعه يا أخى

أما عجيب ..

سافر و روح لدا يضربك و دا يلعنك و دا يغلبك و دا يشحنك

ترجع قتيل المهزله و القرش و غياب الضمير

و الإنفتاح ،

و يكفنوك .. إن كفنوك

و يدفنوك فى قبر ما بيعرف ندم


34

و عشان ماتزعلش ف منامك يا بطل

ح يدشوا ف عيون اللى فاكرك م الفحول

حبة بصل

لاجل الدموع تصحى و ما يصيبها الكسل

و تسيل على قبر الشهيد

ايوه الشهيد

و دا إسم جثة حضرتك بعد اللى فات و اللى حصل ..

و الصبر ييجوا يزرعوه صبار على راس المقام

شفت الكلام ؟!

قال يعنى موتة حضرتك جت مش تمام بيصبروك

أو إن عيشة حضرتك ما عرفت فيها الصبر يوم

قاموا بنصيبك عبروك

و بكاس مرارته قدروك ..

و ان جيت من الغربه سليم

مستور بأرزاق الكريم

تفضح سنين الغربه و الشوق و الألم و الموت ف أحضان الحياه


35

تجعيده باينه ع الجبين

تحت العينين

فوق الخدود

و الضحكه ممزوجه بأنين ندم السنين

و بصوت ربابه

الوتر فيها دبل

أصبح حزين

تلقاه ف صوت المحرومين

مليان حنين

للنيل

و لليل

و القمر

للساقيه فى حضن الغيطان

للطين و ضحكة أرضنا

تبعت سلامها للتروس جوّه المصانع

فى سباق حب الوطن


36

ما بين بذور رافضه لحياتها تندفن

و ما بين خيوط

من فن عامل ع المكن ..

و احترت انا

إحترت بين الغربتين

غربة ضميرى جوّه بيتى ظ!

و الاّ غربة روحى ف بلاد الجَماد ؟!

احترت بين

موتى ف أرضى ؟

و الاّ موت الأرض فيَّه

ف البعاد ؟ ..

دار الصراع بينى و بينى و المحن ..

قابل أنا كل الحلول

رافض أنا كل الحلول

أو حتى أنصاف الحلول

مش دا المهم


37

بس المهم العيشه فين مكتوب لها

و الموته فين ح نكون لها ؟؟ ..

و يدور صراع بين قلب جسمى و جسم قلبى و التشعبيط ف الوجود

جسمى النحيل شايف بإنه يشيل جبال

و القلب شايف إن شيل هَمّى مُحال ..

آآآآآآآآآآآآآآآآآآآآآآآه

آه يا زمن

لك حكمه نفضل محتارين حانيين دماغنا للسنين

نختار ما بين أصعب حلول متعسره

أما الحلول السهله للقطط السمان

متيسره

همّه النعيم و المنظره

و احنا الشقا

و المسخره

آآآآآآآآآآآآآآآآآآآه

آه يا زمن


38

أه يا زمن ماشى لوره ..

عندك يا عم الحاج شغله تلمنى ؟

بدل المياعه و الصياعه و الضياع و البلطجه

شغله

منيش عايز أكون فيها المدير

م انت الإداره و انت كل الأنتكه

شوفلى و لو شغلة خفير

أهى أى شغله تكون شريفه و السلام

و مش مهم يكون مرتبها كبير

و كفايه لقمة فول مدمس

تدهس الجوع و الآلام

د انا حتى عندى أرتكاريا

م الأرانب و الحمام ..

و كفايه حتة خرقه تستر جتتى

تستر فضيحتى و عورتى

بس المهم تكون حلال


39

مش بالحرام

و انا جاى يا عم الحاج يسبقنى العشم

و انت اللى سابقاك ف المروءه سمعتك

سايق عليك اللى انت زرته تلمنى

سايق عليك اللى انت زرته تلمنى و تضمنى

حضن الشهامه فيه مجال ..

إيه نيتك ؟

إيه فتوتك ؟

بتقول مفيش ؟!!!

إزاى مفيش ؟!!!

بقى يعنى وسط الأربعين مصنع مفيش شغله لواحد بالحلال ؟!!!

بقى يعنى جوّه الفقر مكتوب لى أعيش ؟

أنا بشكرك على كل حال

يا حاج مدى باليمين

يا حاج واخد بالشمال

يا حاج خيبت الآمال ..


40

و اتلخبطت سنن الحياه

ف الإنقلاب و الشقلطه

و اتنحرر الواطى على العالى وطى ف أعراف رعاع مستعبطه

و اخده الحياه من تحت باطها أنججيه

ضاربينها طلقة اربيجيه

هدت مبادىء

فرتكت كل القيم

و بقينا لعبة مرمطه ..

إتلخبطت سنن الحياه

الحق فين يا مخبيين الصدق ف نعال الكبار ؟

الصبح فين يا معتمين ع الفجر لا يبان النهار ؟

العقل فين يا محكمين ف الخلق تفكير الحمار ؟

الصبح فين القاه و انا دايخ عليه ؟!

أنا مستعد ادفع حياتى بس عينى تشوف عينيه

و انا ف الضياع

مخطوف أنا


41

مخطوف من الأعماق و من ذاتى و نفسى المُهمَلَه

خطفتنى منى المهزله

و رمتنى جوّه المزبله

و لقيتنى بين عفن الرمم

محتار

غريق ف المسأله

تايه و مش لاقى السبيل

و لا فيش دليل وسط البله

و اتجرأت وسط الضلال و سط الضلام كل الكلاب

ع الهوهوه

رافعه بنباحها الصوت عليا ف الهوا

و الكلب فاكر إنه سيّد للضرير

مادام عجز عن إنه مره يكون بصير

و احتاج لكلب يخرجه

م المعضله ..

و المعضلات


42

لفت رقابنا بألف طوق

خنقانا بأدين العوز و الإحتياج

شيلانا من زمن اللى كان من ذكريات

لزمن يبكّى ع اللى فات

ضاع من زمان أحلى زمان

ضاع لمّا ضاع بينـّا الأمان

ضاع لما نطت فوق رقابنا كلنا

المعضلات

و المعضلات حربايه ف عيون الهموم متلوّنه

جوه القلوب متكوّنه

من تقلها

الكل باصص تحت مش باصص لفوق

الكل خايف يوم يبص لفوق يفوق على الحقيقه المُرّه فِ عيون الندم

إن الألم

ماسك قلم

قاعد يسجل بيه ف دفتر قسوته


43

إسم الذليل اللى عليه الدور بيبدأ من جديد

عشان يعوّض بصّته لفوق بالمزيد م المسكنه

شوف كام سنه ..

و بقيت أنا القادر على ذل السؤال

و لقيت إجابتى ع اللى فِيّه

مش محال

و بقيت ملك

فوق عرش كل المحتاجين ..

و المحتاجين ف المملكه

عايزين وزاره محنـّكه

وزراءها مش من برج عاجى

أو هواه للفزلكه

م المسأله مش منظره و لا أنتكه

و لا تابلوهات متفبركه

دى مسئوليه و عايزه ناس متودّكه ..

عايز أشكلها وزاره مأصّله


44

على قد شعبى و الهموم متفصّله

تفهم جميع المعضلات

و تحل أجعص مشكله ..

و انا مطلبى مش معجزات

و لا مستحيل ف الإنجازات ..

كل اللى عايزه لأمّتى

أقسم معاهم همّهم

يتقاسموا هُمّه ف لقمتى

عايزها لقمة عيش متاحه للجميع

ينسى الرعِيّه معاها إيه حرمان و جوع

لقمه معجونه بكرامة و احترام إنسان ..

و اصبر و اقول

يا حمارتى يا رمز العرَج

إغنينى عن طول انتظارى للفرَج

إغنينى عن نسيان صحاب الجاه و أرباب الحجج

للعبد لله الذليل ..


45

لكن حمارتى العارجه ضاق بيها السبيل

و الرحله بينا طوّلت

تهنا

و تاه بينا الدليل ..

ركَبت أحلامى و طارت بيّه فوق

و ركبت أيامى رمتنى تحت تحت

مدّيت إيديّا فْ جوف ضلوعى و الزمن

أنبش على الأمل اللى ضاع بين الدواهى و المِحَن

أقتل آلامى و الدموع اللى فْ عيون المحرومين

أتمنى بُكرَه يكون جديد

جايب لنا الفجر النهار

أطير ألامس فِيْه جبين الشمس

أبوس خدودها بلهفتى بعد انتظار ..

لكن حمارتى العارجه زهقت م السفر

تعبت من المشوار و م الترحال

و اتنمردت على كل حال


46

لولا إيمانها بالقَدَر ..

تِكبَر ساعات

علشان تناسب رحلتى

تصغر ساعات

تصغر قوى

تضعف قوى قوى تنكمش

لكنها سكة سفر

الرحله فيها طوّلِت

مرميّه ياما ف سكتى كل الحجاره و النقر

سابهالى رحّال قبلى داس نفس الطريق

و كات رحاله اتعثرت

إتكسّرت

إتبعترت

لكنه يا خساره ما وَطاش حتى مَرّه يلمها

فوقعت انا فِ شراك خداعه و رحلتى

و السكّه سابهالى جريحه مضعضعه


47

أطوَل من الليل اللى ما بيعرف ينام

غير ع الرصيف

متغطى بالبرد الحزين و المَضيَعَه

و فضلت انا فوق الطريق

رحّال

على بَرّى غريق ..

و أَدُور أنا بين المَدَاين بالأمل

أوصِل عَمَل

يفصل عمل

أَبنى أمل أوصل عمل يفصل عمل

أدُور ما بين كلّ المداين مَضيَعَه

و القانى مغصوب ع الكمَاين ع الدروب

أطلَع أقع أقوم أقع أقف أقع

و اقول يا واد مابلاش دَلَع

لا يقولوا دا مسَوّس خِرع ..

و لقيت سنين العُمر بتقوللى وداع


48

باى باى بأه

سايباك مع العصر الجديد و العَوْ

لَمه

شبعت انا وَيَّاك ضياع

باى باى بأه أوكى على رنات

و الرنه عندى قنبله و أموات

و العمر أصلاً يا بنى عَدّى و فات

غيرشى ان عمرك ده تبَرُّع للشقا

سيب الزمن يلعب معاك و يهسّكك

و العمر سيبه من جديد ح يْلوِّنك ..

و لقيتنى وسط المسخ مش طايق حياتى و حتى ذاتى اتخلّصِت

من معنى ذاتى المُشكِله

راميانى ذاتى بعيد بعيد عن أصلها

و احترت مين يهدينى تانى لوصلها

بصّيت على كلّ اتجاه

مش مطلبى منصب و جاه


49

ماليش أمَل غير ف الحياه

أصونها و احفظ وِدَّها

ماضى و آتى المَهزَله ..

بَصّيت لقيت الكُلّ جَرى فْ جَرى مَلهِى فْ دَرمَغه

الكُلّ مِتوَحِّد

فِ مَعمَعة الشتات

ثوره و هُوجَه و جَعجَعَه مَلِتِ الوجود

و مجون و رَقص وْ طنطنه من غير حدود

و نعال مِزاحمَه الأدمِغه

هارياها طحن وْ دَغدَغه

و الطين بقى طبَقات و طين على طين طبَق

و طِين بَقى عِلّيوى فوق طينّا الهَفأ

طينّا الوَطِين تحت الرجول جُوَّه السَبَق ..

أمواج ما بين المَدّ و الجَذر القلق

مايبانش تحتيها الصراخ

و لا يرحمك منها الأنين


50

و المُوج عِلِىْ

و ازاى مايعلاش و الحيتان متمتعين

عايزينه يعلا يْطول ولو حَتى السحاب

لكن على حساب الغلابه المطحونين ..

أمواج

ما بين المَدّ و الجَذر القلق

خلّيتنا حانيين الجبين

فِ صَفوِةِ العَصر اللى راجع فِيْه قارون

عصر الجشع

عصر الطمع و الطمَّاعين عَلى كُلّ لون ..

و اهرَبْ من المُوج الغريق

بيشدِّنى قلبى البَرىء

و خيَال حَزين لكن جَرىء

و ارجَع أدَوَّر ع الخلاص

و اتمَلَّى فى كل الوُشوْش

ألقاها مَخزون التعَبْ و اليأس و الحُزن الدَفين


51

إتغيَّرت حَتى الملامح و اختفى الوِشّ البَشوش ..

و رجعت ادَوَّر ع الخلاص جُوَّه النفوس

كل النفوس صَبَحِت جَلِيد

و فين ارُوْح و انا مَطلبى فِيها الدَفا ؟!!!

حَتى القلوب

كانت حديد بَسّ انصَهَر

ما عادش فِ صدور الحيتان

قلب البَشر ..

لَفيت على كل العيون

يمكن ألاقى عيون جريئه تضمنى

تملانى حُبّ املاها نور

تبقالى قلب ابقالها سُور يحميها بالقلب الجسور

أحضنها بالقلب الحنون

و احميها من عصف الزمن بالعمر بين وَهم الظنون ..

إحترت انا بين العيون

بَحلقت حتى فِ العيون لكنها


52

صابها العَمَى

مش شايفه عينى فْ عينها حتى إنما

شايفه الضرير القرش و عيون التيوس

هُمَّه الربيع و السِحر و الأَزهار

هُمَّه النغم و الفن و الأشعار

هُمَّه السعاده

بالفلوس ..

حتى المشاعر؟

أى نعم حتى المشاعر بالفلوس

بكام تِحِب بْكام تحَب بْكام تبَاس بكام تبُوس

بكام بكام تاخد لُبُوس

بكام بكام العِجْل فى عُرف الجاموس

أَبِّج و هات و بلاش تلُوص

ماهى المبادىء و المعانى و المشاعر كُلّها

بَقِت فلوس ..

ظلم و ظلام و الأرض دايره فِ الفلكْ


53

و عيونى شايفه فِ السَمَا نجمى هَلَكْ

شايفه الكواكب و النجوم متصرمَحَه فوق فِ الفضا

و انا اللى تحت الأرض مَيِّت مِ الفضا

فِ دنيا ليها مِيْت دِراع

و الأخطبوط مادِد إيديه

يخنق ف رزقى و يمْتِلِكْ

و صراع ما بين الجيب و جيب و خداع و طحن وْ مَطحَنه

و لقيتنى جُوَّه المَعجَنه

لكن ماليش يا خساره فيها

أىّ عِيش

ماهى مش مدينتى و دنيتى و ازاى تكون

و انا جيت لها تعبان و مش مرتاح لها

أنا جيت لها بفعل الهوَا بفعل الرياح

هيلاهوب شالِت حَضرتى

و ادّيتنى عَرش المَمْلَكَه

و رمتنى فوقه بقايا ماضى مُنتهَكْ


54

فى عَصر أهْلكَ مَن هَلكْ ..

لكن بلادى فِ الأساس

شعلِة مَحَبَّه وْ صَفو قلب و أرض صِدق وْ مُرزقه

بلادى عَدل وْ غيط و رزق و إيد بتِعرَق م الشقا

بلادى حق و كنز مكنون

إمْتى يجمَعنا اللقا ؟

مشتاق لها

مشتاق لها قوى قوى قوى قوى

و سفينتى تاهت عن حدودها و بَرَّها

تاهت سفينتى بين بحار الحُزن و الخوف و التعَب

و لقيتنى مَلاّح مش فِ إيدى دَفتى

الكلمه فِ البَحر البَرَاح

مش كلمتى

و لو اسألُه :

يا بحر ليه أصبَحت قاسى ع اللى فيك و احنا فْ تعَب ؟

يا بحر قول ليه الغضب ؟ ..


55

ألقاه حزين

يرمينى باللوم و العَتب

و يقول : أنا وْ كُلّى بَرَاح

حُضنى مُتاح لِكُلّ غاوى بْرُوْح و حُب

فِيَّا الحيتان لكن كمان فِيَّا الدُرَر

و فِيَّا حُب يْكَفى كون لو ينحَسَبْ

لكن كمان

لِيَّا مَلام

و كام مُلام عَنى احتجَبْ ..

أنا قلت يا بحرى الكبير

رَسِّينى إيه هُوَّه الطلب تلقاه وَجَبْ ..

رَدّ بْألم

و سَالنى مِين ضيَّع هدوئى بالغضب ؟

مين اللى ضيَّع مِنى صَفوى بالجحود و اللى كدَبْ ؟

مين اللى خلاّ دموعى موجى المضطربْ ؟

مين اللى رَبَّى الحُوت فِ جُوفى وْ سابُه ينهَب ما نهَبْ ؟


56

مين اللى كان بيكبَّرُه و يفخمُه و يضخمُه باللى اتنهَبْ ؟

مين اللى عَلِّمْ أىّ حُوْت إن الحلال

قِلِّة أدَبْ ؟

مين اللى خلاَّ الحُوت يفحَّلْ جُوَّه مِنـِّى بالسِفاح ؟

إستفحِلِ الحُوت

عار عَلَيَّه حَمْلى فِيْه

مين السَبَبْ ؟

مين اللى سابُه يْوَزع الأرزاق عليكو و الرُتبْ ؟

مين اللى سبب له الغرور ؟

مين اللى رضيوا يكونوا لديوله نسَبْ ؟

إسمُعنى يا مَلاَّح يا ضايعَه دَفته

الدَفـَّه مش ضايعه وِ دَوَّر و التِفِت

تلقاها فِ أديك لو عَلِيها تبـِّتِت

تلقاها فِ عنيك لو عليها دَوَّرِت

الدَفـَّه مش ضايعه

و لو ح تحِن ليها اتثبـِّتت ..


57

عرفت ليه لومى الكبير ؟

سِرِّىْ خطير

لكنه بان ف الموج ف دمعى ف الغضبْ

و انا عمرى م اكرَه من عشقنى بَسّ شفت كتير عَجَبْ ..

تاهِت سفينتك بيك و فيك

تاهِت و ضاعت من إيديك

و احترت بين قلبى و قلبَك و اللى فِيَّه و اللى فِيْك

هَيِّجت أحزانى لقيتنى بَحر رُعب و مُعضِلات

لكن أنا

أنا مين يخلَّصنى أنا ؟!!!

فين الخلاص اللى انت تتمناه و انا اتمناه من الحُوت السِفاح ؟

فين الخلاص من حُوتى إبن المَهزله و الإنفتاح ؟

إمتى الخلاص من حُوتى مُحتكِرِ احتِكار الإِحتِكار المُحتكَر ؟

إمتى الخلاص من حُوتى مُخترع افتقار ابن الفقيره اللى افتقر ؟

إمتى الخلاص ؟

فين الخلاص ؟ تِقدَر تقول ؟


58

و اجابه على قدّ السؤال

إمتى ح تنقطع الديول اللى وَرَاه لاجل الخلاص ؟

إمتى ح ينقطع الذنـَب و لسان بيرمينا رصاص ؟

قوم يا جَدَع

قوم يا جَدَع و بلاش خيَابَه و استكانه و مَسكنه

قوم يا جَدَع شوف اللى نابك و اللى نابنى معاك انا

قوم فِزّ ياللا نِكتِمِلْ

الجسم انا

و انت العَصَبْ

و انت العَزيمه اللى بها الحُوت ينغلَبْ ..

قوم اقتل الأحزان فِ شعب المَمْلكه

و فْ كل قلب حزين تشوفه مُكتئِبْ ..

قوم انعِش الأفراح و جَدِّد عُمْرَهَا

إلحَقهَا قبل الإحتِضار

طلَّع قوَام شمس النهار

وَقف نزيف الدَمْع فِ عيون مُنتحِبْ


59

حَوِّلها لدموع الفرَح

بالإنتصار ..

مِستنى على إيدَك كتير

مِستنى بَسّ اسمَع نفير

م انا أصلى ضامنك يا فقير يا ابن الفقير

و انت اللى شفت القهر ف بلادك كتير

عارفك و ضامنك إيد طهُوْرَه و صِدق فِلْسان بُكْرُه جاى

حارسك و صاينك رَبِّنا

بحَق سَيِّدنا النبى ..

و انا بَرضه مستنى تِوَفـِّىْ مَطلبى

و اتحدَّى بيك كل الشعوب

وساعتها ح تكون الملك

فوق عرش كل المرتاحين




============================================

تمت بحمد الله تعالى

الرجوع الى أعلى الصفحة اذهب الى الأسفل
http://almaktaba.own0.com
الاميرة
عضوة
عضوة


انثى

تاريخ الميلاد: 10/10/1970
إسم الدولة - إسم المدينة: المغرب

العمل - الوظيفة: بقطاع الفن و الادب
تاريخ التسجيل: 22/05/2013
كيف تعرفت علينا ؟: الانترنيت
عدد المساهمات: 1
نقاط: 4693
درجة النشاط فى الموقع: 10
العمر: 43

مُساهمةموضوع: رد: مونودراما شعريَّة " ‏مملكة كَفر الغَلابَه " للشاعر علاء الدين سعيد    السبت 25 مايو 2013, 12:05 am

روعة فعلا
الرجوع الى أعلى الصفحة اذهب الى الأسفل
 

مونودراما شعريَّة " ‏مملكة كَفر الغَلابَه " للشاعر علاء الدين سعيد

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

 مواضيع مماثلة

-
» دعاء نبوى مبارك جامع لابواب الخير وسبب لقضاء الدين
» حصريّ حلا الترك مع المذيع : سعيد المعمري في الأمارات :)
» السيّد: مـــزوار محمد سعيد يتحدث عن جدل هيجل
» قصيدة (الجمهرة) للشاعر (حامد زيد)
»  محمد سعيد الصحّاف.. الرجل الذي أبهر العالم بخطاباته

صلاحيات هذا المنتدى:لاتستطيع الرد على المواضيع في هذا المنتدى
مكتبة مؤلفات الشاعر علاء الدين سعيد  ::  :: -
التبادل الاعلاني

انشاء منتدى مجاني



سحابة الكلمات الدلالية
كلثوم
بحـث
 
 

نتائج البحث
 
Rechercher بحث متقدم
إعلانات الموقع
















جعل العناصر اسفل الموقع
لوحة مفاتيح(كيبورد)


بعد الإنتهاء من الكتابة حدّد النص و إضغط "Crtl + c " للنسخ و "Crtl + v " للصق


جميع الحقوق محفوظة

جمهورية مصرالعربية
جميع الحقوق محفوظة للشـاعـر/عـلاء الديـن ســعـيـد
  http://almaktaba.own0.com
حقوق الطبع والنشر©2011 - 2010 مـوقـع مكتبة مؤلفات الشـاعـرعـلاء الديـن ســعـيـد

يوتيوب علاء الدين سعيد